BELEGGERS DREIG OM TE ONTTREK
DRIE biobrandstofmaatskappye wat gereed staan om aanlegte in Suid-Afrika te begin bou en teen Oktober vanjaar biobrandstof te produseer, het in ’n verklaring hul “diepste misnoeë en teleurstelling” met die Regering uitgespreek. Dit is aangesien die Regering glo onnodig draal om die nodige regulasies te publiseer wat hulle in staat sal stel om hul aanlegte te begin bou.
Die maatskappye kan nie in Oktober begin produseer nie omdat dit 18 tot 24 maande kos om ’n aanleg te bou en in bedryf te stel, en hulle dreig nou om hul belegging te onttrek. So ’ n onttrekking sal ’n ineenstoring van die bedryf verteenwoordig nog voor dit begin het. Dié maatskappye is Mabele Fuels, wat ’n bio-etanol-aanleg by Bothaville beoog, en PhytoEnergy en Clean Tech Africa, wat albei biodiesel wil produseer.
Reeds in Augustus 2012 se Staatskoerant is aangekondig dat die regulasies teen 1 Oktober 2015 in werking sal tree. Die probleem is dat die regulasies stééds nie gepubliseer is nie, al het die Regering hom voorheen daartoe verbind om die finale beleidsdokument, verpligte ver menging- pers e nt as i e s e n staatsubsidiëring reeds in Mei/ Junie verlede jaar te publiseer.
Die maatskappye sê in die verklaring “die Regering het herhaaldelik ’ n beroep op die pri- vate sektor gedoen om meer te doen om die toekoms vir gewone Suid-Afrikaners te verbeter. Beleggers in die biobrandstofbedryf het tot dusver presies dít probeer doen, maar die Regering het nagelaat om sy beloftes na te kom.”
Al drie het reeds die nodige lisensies as biobrandstofvervaardigers gekry, asook alle nodige boupermitte. Hulle sê nog vyf ander biobrandstof-lisensiehouers is in wisselende mate van gereedheid.
GEEN LEIERSKAP
In die verklaring sê die maatskappye: “Ongelukkig is die dokument tot dusver nog nie gepubliseer nie, en interaksie tussen belanghebbendes en die departement het aansienlik verskraal. Beleggers en voornemende beleggers in die jong bedryf word toenemend gefrustreer deur die klaarblyklike gebrek aan fokus en leierskap in die departement.”
Dit word benadruk dat die Regering sy eerste strategie-beleid vir ’n kommersiële biobrandstofbedryf al in 2007 bekend gestel het, en dat ’ n toetsfase toe vir 2013 in die vooruitsig gestel is.
Die drie ondernemings benadruk dat hulle reeds miljoene rande aan navorsing, permit-aansoeke, kontraktering en ondersoeke oor die haalbaarheid van die bedryf bestee het.
Naas die werkskepping en ander ekonomiese bydraes wat biobrandstofaanlegte Suid-Afrika bied, behels die meeste projekte ook alternatiewe elektrisiteitstelsels waarmee krag opgewek kan word, wat tot die nasionale kragnetwerk kan bydra.
Die drie maatskappye doen nou ’ n dringende beroep op die Regering om die finale bel eidsdokument af t e kondig en met die amptelike aansoekproses om subsidies te begin.
– MARLEEN SMITH
‘Beleggers en voornemende beleggers in die jong bedryf word toenemend gefrustreer deur die klaarblyklike gebrek aan fokus en leierskap in die departement.’