BLOEKOMS IS NIE NET INDRINGERS

Hoewel bloekombome indringers kan wees, is dit ’n belangrike voedselbron vir inheemse bye, wys ’n nuwe studie deur die Suid-Afrikaanse Instituut vir Biodiversiteit (Sanbi).

Terwyl heuningbye vir die bestuiwing van rondom 50 gewasse in Suid-Afrika verantwoordelik is, teen ’n waarde van R10,3 miljard per jaar, is hul voerbronne in die gedrang. Dit is ’n groot probleem vir byeboere, wat die kolonies bestuur om heuning te oes en bestuiwingsdienste aan ander boere te lewer, waarsku mnr. Mbulelo Mswazi en me. Carol Poole, twee Sanbi-navorsers, in ’n verklaring.

Hul ondersoek het getoon dat bloekombome, sekere gewasse, inheemse bome en struike, blomplante in voorstedelike tuine en selfs veldblomme en onkruid langs die paaie van die uiterste belang vir inheemse bye is.

Die afname in heuningbybevolkings die wêreld oor word onder meer toegeskryf aan ’n gebrek aan voedingsplante wat die nektar en stuifmeel produseer wat bye benodig om gesond te bly. Byeboere in ál Suid-Afrika se provinsies is van bloekombome as voedingsbron vir hul heuningbye afhanklik. Dié bome is betroubare verskaffers van stuifmeel en nektar amper reg deur die jaar.

Party bloekomsoorte kan wel indringers wees en ander, ongunstige gevolge vir biodiversiteit en die land se waterhulpbronne hê, of erosie en ’n verhoogde brandrisiko meebring. Hulle behoort egter net uitgekap te word as hulle wel ’n ongunstige uitwerking op die omgewing het, sê die Sanbi-span. Verskeie bloekomsoorte wat belangrike voedingsbronne vir bye is, kom nie in die amptelike beheerregulasies voor nie en behoort buite oewergebiede in stand gehou en geplant te word, sê hulle. – MARLEEN SMITH