NUWE REEKS
Dit is meer as drie jaar sedert die eerste gesertifiseerde Karoolam in November 2011 in die Wes-Kaap verkoop is, en baie mense vra deesdae waar staan die proses om Karoolam te beskerm. Prof. Johann Kirsten, hoof van die departement landbou-ekonomie, voorligting en landelike ontwikkeling aan die Universiteit van Pretoria, skryf ’n reeks van vier artikels vir Landbouweekblad. Hierin gee hy ’n oorsig van die vordering met die inwerkingstelling van die sertifiseringskema vir Karoolamsvleis van Oorsprong en die wetlike prosesse wat reeds ingestel is om Karooboere te beskerm teen die misbruik van die woord “Karoolam”.
moontlikheid om elke pakkie vleis tot by die plaas te kan naspeur. Dit vereis egter dat verpakkingsaanlegte en/of slaghuise gedetailleerde state moet hê, asook gesofistikeerde rekenaarstelsels om die etikettering só te doen dat die spesifieke plaasnommer op elke pakkie vleis verskyn. Dié aspek strook met die moderne verbruikersbehoefte, maar nie alle kleinhandelaars is gerat daarvoor nie.
Daarom is daar onlangs ’ n tweede vlak van sertifisering ingebring wat dit vir kleinhandelaars moontlik maak om te sê hulle verkoop wel wetlik Karoolam. Volgens dié proses is die vleis of karkas naspeurbaar tot by die slagplaas in die Karoo. Die slagplaas kan dan bewys dat die boer wat die lam gelewer het, regtig in die Karoo is en nie lammers uit ’ n voerkraal of vanaf lusernweiding gelewer het nie.
Ingevolgde die alternatiewe sertifiseringsproses kan die aanspraak dat die produk uit die Karoo kom, geverifieer word en mag die sertifiseringsmerk op die pakkie verskyn. Waar die kleinhandelaar magtiging kry om volle naspeurbaarheid toe te pas, maar sy eie handelsmerk wil behou, kan hy die plakker gebruik wat naspeurbaarheid tot by die plaas moontlik maak.
SÓ WORD KAROOLAM BEVORDER
In die afgelope twee jaar was die KDF deur sy boere-organisasie, Meat of Origin Karoo (MOOK), nou betrokke by die werwing van en handel in Karoolam. Dit was nodig om die aanvanklike blootstelling in die vleishandel te bewerkstellig en die sertifiseringsproses by boere, slagplase en handelaars in te faseer.
Soos die proses van sertifisering ingefaseer en die etiek, filosofie en prosesse deeglik verstaan is, is daar besluit om die werwing en handel volledig terug te plaas in die hande van die slagplaas en die kleinhandel. Slagplase sal voortaan die prys van Karoolam bepaal. Hulle moet met gesertifiseerde boere onderhandel oor die premie wat hulle vir Karoolam betaal. Dié reëling is begin verlede jaar ingestel. Sover werk dit goed, met heelwat kleinhandelaars en verpakkers wat nou regstreeks met slagplase skakel vir die lewering van gesertifiseerde Karoolam.
Die KDF het in die 2014/’ 15- boekjaar meer as R1 miljoen aan bemarking, verbruikersopvoeding en bewusmakingsprogramme bestee om daardeur die slagplase te help om meer kliënte vir Karoolam-produsente te werf. Dit sluit in televisiereklame, die ondersteuning van sjefs en restaurante om Karoolam te bekom en te bevorder, asook deelname aan die Pick n Pay Taste-feeste in Kaapstad, Johannesburg en Durban. Gaste by laas jaar se Woordfees op Stellenbosch en die KKNK op Oudtshoorn is ook deur die Kokkedoor- sjefs van Karoolam voorsien.
Vir die bestuur van ’ n nisproduk, soos Karoolam, is koördinasie tussen rolspelers belangrik en het die KDF besluit om Meat of Origin Karoo, ’n maatskappy sonder winsbejag, aan die rolspelers in die waardeketting oor te dra om as die bedryfsorganisasie vir Karoolam te dien.
Dit word gevolglik ’n “gehaltekonsortium” waarbinne boere, slagplase, onafhanklike slaghuise, verpakkers en groot kleinhandelsgroepe verteenwoordig word. Die konsortium moet sorg dat die gehalte en reputasie van die naam “Karoo” met integriteit bestuur word sodat dit nie net nog ’ n foefie word nie. Die betrokkenes moet dus seker maak die reëls is van pas, ouditbaar en dat dit die nodige vertroue by die verbuiker inboesem.
Die eerste vergadering van die konsortium vind vandeesmaand in Gauteng plaas. In die volgende uitgawe word die kommersiële waarde van die sertifiseringskema bespreek. Dit is onwettig om die woord “Karoolam” op vleis of vleisprodukte aan te bring tensy jy aan sekere voorskrifte voldoen. Dié aspek word ook bespreek.