‘LANDBOU NOG NOOIT SÓ ROOSKLEURIG’
INDIEN die verwagte toename in die vraag na voedsel tot 2050 as ’n aanduiding vir die potensiële groei in landboubelegging beskou kan word, het die beleggingsmoontlikhede in landbou nog nooit só rooskleurig gelyk soos nou nie.
Mnr. Loffie Brandt, nasionale bestuurder van Absa se verkope-en-ondersteuningsafdeling, skryf die verwagte toename aan hoofsaaklik twee dryfvere toe. Eerstens word verwag dat die verbruik van voedsel as lewensmiddel in die volgende 35 jaar tot 2050, die verbruik daarvan die afgelope vyf eeue sal oortref. Dit is hoofsaaklik weens ’n verwagte bevolkingstoename in vernaamlik Afrika en Asië van meer as 2 miljard mense, terwyl die vraag na voedsel in Europa na verwagting sal afneem.
Brandt het op Absa en John Deere se jaarlikse sektordag in Bloemfontein gepraat. Hy het gesê weens ’ n vervaging in die grense tussen energieverbruik as lewensmiddel, hernubare energie, asook as ander gebruike vir voedsel (soos die produksie van bioafbreekbare plastiek) het die verwagte vraag na voedsel die bevolkingsgroei oortref. Dit skep ’n verdere vraag wat deur landbouproduksie gevul moet word. Om in dié groeiende vraag te voorsien, moet landbouproduksie teen 2050 meer as verdubbel.
Volgens Brandt skep die wisselvalligheid van die rand teenoor die groot geldeenhede terselfdertyd bykomende risiko’s én geleenthede vir die landbou. “Die meeste van boere se produksiekoste, of dit nou brandstof, kunsmis, saad of toerusting is, het ’n sterk verband met die rand-dollar-wisselkoers,” sê hy. “Vir sekere uitvoergerigte subsektore in die landbou het die verswakking van die rand egter wesenlike inkomsteverhogings geskep.”
Volgens Brandt is een van die ongunstige uitvloeisels van die wêreldekonomie dat die winsgewendheid per hektaar sy dalende neiging vanjaar sal voortsit. Dit bly die primêre dryfkrag agter die internasionale neiging van groter wordende ekonomiese boerderyeenhede.
“Die groeiverhaal van die landbou in Afrika suid van die Sahara bly aantreklik vir plaaslike ondernemings wat dié lande verstaan en oor strategiese vennootskappe met sleutelrolspelers beskik, sê Brandt. “Terwyl wêreldwye groeivoorspellings veral in die groot, opkomende ekonomieë gedemp bly, sal die vinnig groeiende Afrika-markte toenemend ’ n groter deel van Suid-Afrika se landbou-uitvoer uitmaak.” – JOHAN NORVAL