DIÉ WEEK IN DIE LANDBOU

Februarie se verkope van trekkers en stropers was aansienlik beter as wat die mark verwag het. Dit was ook beter as in Januarie en selfs beter as in Februarie verlede jaar. Vir die jaar tot einde Februarie was verkope 6% laer as in die vorige jaar, wat senuagtigheid in die mark as gevolg van die swak reënval weerspieël. Ontleders is veral verbaas oor die 43 stropers wat in Februarie verkoop is, teenoor 32 verlede jaar. Die Suid-Afrikaanse Landboumasjinerie-assosiasie verwag dat verkope vanjaar tussen 5% en 10% laer sal wees as verlede jaar.

WESKUS-RESTITUSIE

Die oordrag van grond wat in ’n historiese grondrestitusie-saak aan die gemeenskap van Ebenhaeser tussen Vredendal en die Olifantsrivier toegeken is, kan in Mei begin. Dit volg nadat die hooggeregshof in Kaapstad die saak van sommige private eienaars van grond, wat nie wil verkoop nie, van die hoofaansoek geskei het. Die totale eis beloop 23 000 ha, wat 52 private wynplase insluit. Die Regering het R350 miljoen vir die eis beskikbaar gestel. – Die Burger

TAMATIESIEKTE KOM

’n Verwoestende tamatieplaag kan binne ’n jaar in Suid-Afrika opduik. Die Departement van Landbou sê Tuta absoluta, ’n tamatieblaarmynermot, kom uit Suid-Amerika en het al groot skade in Europa en Noord-, Oos- en Wes-Afrika aangerig. Dit is verlede jaar die eerste keer in Kenia gevind. Die plaag kan tot opbrengsverliese van tussen 50% en 100% lei. Dit kan ook vinnig weerstand teen plaagdoders ontwikkel, maar weerstand kan voorkom word deur die oordeelkundige gebruik van geregistreerde plaagdoders. ’n Volledige berig sal in Landbouweek

blad van 3 April verskyn.

KOS VERMORS

Omtrent ’n derde van alle kos wat geproduseer word, word vermors. Pogings om vermorsing te beperk, kan ’n besparing van R3 550 miljard teen 2030 teweegbring. Soos wat die wêreldmiddelklas groei, sal die waarde van verlore kos tot R7 100 miljard toeneem. Tussen 1,3 miljoen en 2,6 miljoen ton kos gaan glo per jaar verlore omdat die raklewe verstryk het. As die raklewe met een dag verleng kan word, kan 250 000 ton kos nog benut word. Een van die aanbevelings is dat die raklewe deur voedselveiligheid bepaal word en nie gehalte nie. – Alan Harman

MOORDE BY EU

Mnr. Henk van de Graaf van die TLU SA het ’n vergadering in die Europese parlement toegespreek om plaasmoorde onder die internasionale gemeenskap se aandag te bring. Grondhervorming en die moontlike bedreiging van boere se eiendomsreg was ook onder bespreking. Parlementslede is versoek om sanksies teen pres. Jacob Zuma in te stel. Parlementslede wil glo oor die saak debatteer op ’n algemene vergadering van die Europese Parlement.

MEER VROUE BOER

Al hoe meer vroue boer, veral in Amerika waar ’n derde van die boere ouer as 65 is en al hoe minder jong mense wil boer. Volgens data van die Amerikaanse regering was sowat 14% van die 2,1 miljoen Amerikaanse boere in 2012 vroue, aansienlik meer as die 5% in 1978. Gevorderde tegnologie, wat handearbeid verminder, en goeie wins in die landbou dra glo veral by tot hierdie neiging. – Bloomberg

Yster! Hierdie koedoebul, met ’n horinglengte van 61,25”, het die rekordbedrag van R400 000 vir ’n koedoebul in SuidAfrika behaal op die Gravelottewildprodusente se wildveiling op 7 Maart op BelaBela. Die veiling is deur Vleissentraal Bosveld aangebied. ’n Koedoebul in Namibië is ook al vir R400 000 verkoop.