BOER IN MOSAMBIEK: PASOP VIR KANSVATTERS

Dankie aan LBW vir die plasing van blogs oor Jurie van der Walt se wedervaringe in Mosambiek. Dié boer se teleurstellings en suksesse in die vreemde verdien lof.

Van ons boere wat met een oog na Mosambiek loer, kan regtig kennis neem van hierdie besonderse boer. Om binne een jaar in Mosambiek tot raadgewer van die Bilene-dorpsraad te vorder, is ’n duidelike bewys van die durf en daad van ’n boer wat wil!

Dit is tog interessant dat daar altyd iemand soos Danie, na wie daar in die blogs verwys word, opduik om mense om die bos te lei. Hier in Limpopo is verskeie boere wat ’n bloutjie in Mosambiek geloop het – hoofsaaklik omdat daar op prinse vertrou is en die regte kanale nie gevolg is nie.

’n Groep van ons se eerste les was in Xai- Xai toe ’ n man uit Suid-Afrika stranderwe aan ons wou verkoop.

Maar die grootste les was op Maragra naby Manicha waar 300 ha suikerrietlande sogenaamd te koop was. Van die beste landbougrond denkbaar is by Maragra. ’n Voormalige melkboer van Noordwes sou met die hulp van sy vriende in die Parlement help om van die plase te bekom. Die grond was met gras en riet begroei wat voor aanplantings uitgeroei moes word. Die weldoener sou ons ook help om op ’n kontrakbasis die aanplantings te doen.

Met ons besoek aan Maputo moes ons egter verneem dat die minister uitstedig was en ons nie die kontrakte kon kry nie.

Skaars terug in Pretoria ontvang ons ’ n boodskap dat ’n vliegtuig met spuitstof gereed staan om die lande te bespuit. Ons moes onmiddellik R50 000 kontant in die boer se rekening betaal. Nodeloos om te sê dat die geld was om hom uit die tronk te kry vir bedrog en vir ’n vliegtuigkaartjie Nieu-Seeland toe, waar hy verdwyn het. GAWIE RICHTER