GRAAN SA WIL KONTANTMARK UITBOU
DIE kontantmark moet in só ’n mate bevorder en ontwikkel word dat dit die uitwerking van die liggingsdifferensiaal kan uitskakel,” het mnr. Andries Theron, ondervoorsitter van Graan SA, op dié organisasie se afgelope kongres gesê.
Hy het ná ’ n hernude debat oor die differensiaal gesê dit is ’n JSE-instrument waaraan niks gedoen kan word nie. Graan SA moet eerder die deursigtigheid van die kontantmark bevorder sodat produsente dit kan benut.
Hy sê Graan SA ondersteun die vryemark en as daar iets is wat daarmee inmeng – ongeag of dit die liggingsdifferensiaal of iets anders is – behoort hulle daarteen op te tree.
Mnr. Louw Steytler, voorsitter, het gesê daar is nie eers konsensus onder produsente in die land oor die benadering tot die differensiaal nie.
“Die onderlinge verskille kan Graan SA skade berokken en skeur tot nadeel van elkeen van ons. Net soos in die Wes-Kaap is daar ook in die noordelike produksiegebiede omstredenheid en verskillende standpunte daaroor. Ons ondersoek alternatiewe vir die termynmark.” (Sien ook die brief op bl. 8)
Steytler sê hulle neem kennis daarvan dat dit ’n sakemodel van die JSE is en dat die JSE besluit het om dit te behou: “Die aanbeveling is dat die kontantmarkte in die onderskeie streke verder ontwikkel word om dit deursigtiger te bestuur.” Hy sê dit is noodsaaklik dat ander bemarkingsmetodes ondersoek word en as Graan SA sy eie silogeriewe moet skep, sal daarna ook gekyk word.
Hy sê Graan SA sal ook voortgaan om die billike berekening van die differensiaal deur die JSE te moniteer en indien nodig by die JSE op die herberekening daarvan aan te dring.
“Ek waarsku vandag die hele waardeketting van voedselproduksie in die land: Die produsente veg om ekonomiese oorlewing en enige uitbuiting moet verwerp word omdat dit die vermoë om genoeg voedsel te kan produseer, bedreig. Ons het eerlike, ordentlike mense in die waardeketting nodig wat die gevolge van hul optrede besef.” – NICO VAN BURICK