LANDBOUNUUSBROKKIES MPO KRY NUWE BAAS
’n Veearts vir wie melkbeeste nog altyd ’n voorliefde was, is as die nuwe uitvoerende hoof van die Melkprodusente-organisasie (MPO) aangestel.
Dr. Chris van Dijk ( het vir 15 jaar by Zoetis (voorheen Pfizer) gewerk het en tree nou as senior bestuurder uit. Voor dit was hy 18 jaar lank veearts op Bethal.
Op skool het hy verskeie vakansies op melkplase deurgebring, sê Van Dijk. “Deel van my vakansiepraktyk in my derde jaar op universiteit was op ’n plaas waar Simmentalers gemelk is. Die maand daar het my finaal op die suiwelpad geplaas.”
Van Dijk sê melkboere kom voor groot uitdagings te staan. “Op alle vlakke, veral polities, ekonomies, sosiologies, tegnologies en wetlik, verander alles byna daagliks. Melkboere sal mededingender moet word.”
BO)
Sojaboonsaadproduksie het vanjaar met 172% gestyg. Volgens Graan SA se sojaboonwerkgroep sal daar in die nuwe produksiejaar genoeg saad vir 620 000 ha wees.
Verlede jaar is daar 687 000 ha sojabone aangeplant, maar daar was net genoeg saad vir 360 000 ha by maatskappye beskikbaar.
Mnr. Jan Grey, werkgroepvoorsitter, sê die beskikbaarheid van saad was in die verlede altyd ’n probleem. Daar kon voorheen net in 20% van die vraag voorsien word.
Daar word glo ook goeie vordering gemaak met ’n finansieringsmodel vir tegnologie-ontwikkelaars om seker te maak Suid-Afrika het toegang tot die nuutste kultivars. Tot 80% van saad word op plase teruggehou. Daar is dus geen motivering vir saadmaatskappy om nuwe kultivars na die mark te bring nie.
’n Soortgelyk model as die Wintergraantrust se navorsingsheffing vir koring word beoog. Mnr. Corné Louw, sekretaris van die werkgroep, sê die mikpunt is dat boere betaal volgens tonne gelewer en dan ’n terugbetaling kry op saad wat aangekoop is sodat dubbele tegnologiekoste nie van hulle verhaal word nie.
Grey sê boere kan reeds ’n verhoging van 10% tot 15% in opbrengste verwag as die Roundup Ready 2-geen die verouderde RR1-geen in Suid-Afrika kan vervang.
–
Die sagtevrugtebedryf se nuwe grondhervorming-en-transformasieplan is voorverlede week in die Paarl bekend gestel. Agter, van links, staan mnre. Walter Williams van Ceres, Job Mothobeni van Mpumalanga, Anton Rabe (Hortgro), Nicholas Dicey (vrugteboer van Wolseley en voorsitter van Hortgro) en Elton Jephtas van die Bergrivierstreek. Voor, van links, staan mnre. Pitso Sekhoto, voorsitter van die DFDC-SA, en Piet Kiewiets van die Langkloof. FOTO: LUCILLE BOTHA