Cele wil na Iran uitvoer
MNR. Bheke Cele, Adjunkminister van Landbou, Bosbou en Visserye, het Iran onlangs besoek om te praat oor moontlike samewerkingsooreenkomste rondom navorsing en ontwikkeling, verbeterde produksievermoëns en doeltreffende waardekettings in die landbou, bosbou en visserye. Dit sluit ook marktoegang en belegging in.
Iran het in die afgelope dekades sy eie voedselproduksie aansienlik vergroot. In 1979 het Iran 65% van sy voedsel ingevoer, maar produseer nou ongeveer 66% van sy eie voedselmandjie en hy moet steeds ’n beduidende hoeveelheid voedsel invoer.
Die onafhanklike navorsingsinstituut Future Directions International (FDI) sê die Iranse landbousektor gaan gebuk onder swak belegging en droogtes.
Om sy stapelvoedsel, koring, self te kan onderhou, is vir Iran uiters belangrik.
In 2013 het Iran egter koring ter waarde van $214 miljoen (sowat R2,6 miljard) ingevoer. Hy voer ook mielies, sojabone en vleis in, hoofsaaklik van die Verenigde Arabiese Emirate, China en Turkye.
Mnr. Mooketsa Ramasodi, adjunkdirekteur- generaal van die Departement van Landbou, Bosbou en Visserye, sê onderhandelinge is reeds afgehandel en ’n konsep-memorandum van verstandhouding sal na verwagting vandeesweek in die hoofstad, Teheran, onderteken word.
Die adjunkminister en sy Iranse eweknieë – die adjunkminister vir diereproduksie, asook die adjunkminister vir navorsing, opleiding en visserye – het twee werkgroepe in hierdie verband op die been gebring.
Ramasodi sê ’n gesamentlike werkgroep sal verantwoordelik wees vir die inwerkingstellingsplan sodra die ooreenkoms onderteken is. Die voorlopige inwerkingstellingsplan sluit onder meer in die ondersoek na en oorweging van die invoer en uitvoer van plant- en dieremateriaal, diereteelvoeding, vrugte en groente, sierblomme en beesvleis.
Ramasodi sê hulle s al ook ondersoek instel of die twee lande op die tegnologiese en inligtingsfront kan saamwerk rakende veeteelt, volstruisboerdery, mielieproduksie, tuinbou en visserye, wat ook akwakultuur insluit.
Verder sal daar ook uitruilprogramme vir personeel en studente wees.
Die memorandum van verstandhouding sal later vanjaar onderteken word wanneer pres. Jacob Zuma Iran besoek.
– JOYLENE VAN WYK