VEE HOE RAAK INPLANTATE TEELVERMOË?
Groeibevorderingstegnologie is ontwikkel om die gemiddelde daaglikse gewigstoename (GDT) en voeromsettingverhouding (VOV) by manlike en vroulike diere in voerkraaltoestande te verbeter.
Daar is ’n verskeidenheid produkte op die mark wat onderskei word volgens hul sterkte. Hulle word geklassifiseer as sag ( mild), gemiddeld en sterk. Die laaste twee tipes, wat kombinasieprodukte in verskillende sterktes en verhoudings is (dit bevat trenboloonasetaat en estradiol 17 Beta), moet nooit geïnplanteer word in diere wat vir teeldoeleindes gebruik gaan word nie. Die gebruik daarvan veroorsaak dat die diere se eie voortplantingshormoonstelsel onderdruk word en selfs kan afsluit. Die gevolg is dat jy die voordeel van gewigstoename kry, maar as jy die verse by die bul sit, sal hulle nie beset raak nie. Dieselfde beginsel geld manlike diere.
Daar is drie inplantate wat wel by vervangingsverse gebruik kan word. Twee daarvan is in Suid-Afrika geregistreer, maar net een is kommersieel beskikbaar. Die inplantate bevat seranol en daar is twee sterktes. Gewone Ralgro (G1406) bevat 36 mg seranol en Ralgro Super bevat 72 mg seranol.
Ralgro (36 mg) is die enigste produk wat gebruik moet word by verse wat vir teeldoeleindes geselekteer is. Die inplantaat moet net een keer toegedien word. As die inplantaat meer as een keer gebruik word, kan dit die teelvermoë van die vers verminder (met sowat 8%). Die inplantaat moet op die ouderdom van een maand tot drie maande toegedien word – nie vroeër of later nie, want dit sal ook die teelvermoë verminder.
Daar is ook ander opsies beskikbaar om seranol toe te dien (inspuitbare Zeramec, G3660). Ek gebruik die inplantaat wat agter die oor toegedien word.
Dr. Shaun Morris is ’n voerkraalkonsultant.