WILD/VEE SNOTSIEKTE-OORDRAG
In Desember is snotsiekte in my kudde gediagnoseer en ek het sewe dragtige koeie verloor. Ons het daarna ál elf blouwildebeeste laat uitskiet. Hoe lank leef die virus in die veld voort? Kan die beeste weer siek word? Sommige bronne sê as die oorsaak, in hierdie geval die wildebeeste, verwyder is, verdwyn die gevaar. Ander bronne sê dit kan nog tot sewe maande duur. Ons kry nie veel betroubare inligting oor die siekte nie. Moet ons die beeste na ’n ander plaas verskuif?
Die virus leef glad nie voort in die veld nie en ander beeste het geen kans om siek te word vanweë die virus in die omgewing nie. As daar geen wildebeeste in die omgewing oor is nie, het die gevaar verdwyn, selfs al is dit net een dag nadat hulle verwyder is. Van die ander beeste kan egter nog siek word omdat die inkubasietydperk van snotsiekte gewoonlik vier tot agt weke is en in sommige gevalle etlike maande. Dit kan gebeur al is daar nie meer wildebeeste nie. Dit is hoekom sommige bronne sê dit kan sewe maande duur voordat daar redelike sekerheid is dat verdere gevalle nie gaan voorkom nie.
Dit is nie raadsaam om die beeste na ’n ander plaas te verskuif nie. Ons weet deesdae wanneer snotsiekte op ’n plaas uitbreek, raak ’n groot deel van die kudde besmet, maar min diere word siek en vrek. Beeste wat nie siek geword het nie, bly draers van die virus, hoewel hulle dit nie na ander, vatbare beeste kan oordra nie (slegs wildebeeste kan dit doen). Wanneer hulle self egter blootgestel word aan stres (soos verskuiwing na ’n ander plaas) kan die siekte onder party van hulle voorkom.
Boere moet egter nie onder die indruk kom dat indien hulle voorheen uitbrekings gehad het, die meeste van hul beeste nou ’n risiko is vir verdere uitbrekings nie. Die herverskyning van die siekte bly ’n skaars verskynsel. Dit verklaar egter sommige uitbrekings wat plaasgevind het sonder dat wildebeeste teenwoordig was.
Prof. Moritz van Vuuren is ’n viroloog aan die fakulteit veeartsenykunde van die Universiteit van Pretoria.