ESKOM-SPITSTYE VIR WINTER GAAN VERANDER
Eskom het aangekondig hy gaan spitstye vir elektrisiteitsgebruik in die komende wintermaande aanpas. Ná ’n voorlegging aan die Nasionale Energiereguleerder (Nersa) in Desember verlede jaar is die voorstel aanvaar en gevolglik sal die winteroggend en -aand spitstye met een uur vervroeg word vanaf 7:00 tot 10:00 na 6:00 tot 9:00 soggens en vanaf 18:00 tot 20:00 na 17:00 tot 19:00 saans.
Dit volg na aanleiding van ’n studie deur die nasionale energieverskaffer wat bevind het dat, hoewel die stelsel se spitstydaanvraag na elektrisiteit tussen ses en sewe soggens en halfses en halfsewe saans plaasvind, die tarief vir spitstye eers teen seweuur die oggend en sesuur saans ’n aanvang neem. Eskom meen die winter spitstydtarief, wat ’n uur vroeër gaan begin as wat tans die geval is, ’n bydrae sal lewer om die huidige beperkings op die stelsel te help oplos.
Die bykomende voordele vir Eskom sluit onder meer in dat die tydsduur van gebruik van duurder elektrisiteitsopwekkingseenhede verminder kan word en dat die elektrisiteitsverskaffer ook beter sal kan beplan vir ’n effens laer onmiddellike vraag na elektrisiteit.
Die vervroeging van die spitstye in die winter sal ’n invloed hê op verbruikers van Eskom se Ruraflex-, Miniflex-, Megaflex-, Transflexen WEPS-tariewe. Wat die koste vir dié kliënte betref, meen Eskom indien verbruikers teen die tariewe by die vervroegde spitstye hou, daar nie ’n verandering in hul rekeninge weens die verandering in spitstyd sal wees nie. – GERRIT BEZUIDENHOUT