HOENDER: YANKS SÊ NEE VIR INVOERVERBOD; SA PROBEER WEER
DIE Suid-Afrikaanse pluimveebedryf het ’n tweede aanbod aan sy Amerikaanse eweknie gemaak oor hoeveel Amerikaanse hoenderstukke met die been daarin die land kan binnekom.
Die Amerikaners het die eerste aanbod verwerp, sê mnr. Kevin Lovell, uitvoerende hoof van die Suid-Afrikaanse Pluimveevereniging (SAPV).
Hy wou nie uitwei oor die hoeveelhede wat die aanbod behels nie omdat onderhandelinge nog voortduur.
Lovell was vroeg in Maart deel van ’n Suid-Afrikaanse afvaardiging onder leiding van mnr. Faizel Ismail, ’n spesiale gesant van die Departement van Handel en Nywerheid, wat Amerika besoek het. Die Amerikaanse pluimveebedryf eis dat Suid- Afrika sy 15 jaar oue teenstortingstariewe ophef sodat Amerikaanse hoender weer hierheen uitgevoer kan word. Die eis word as voorwaarde gebruik vir Suid- Afrika se insluiting in die hernuwing van die Amerikaanse wet op groei en ontwikkeling in Afrika (Agoa).
GAPING
Ismail sê ná Suid-Afrika se eerste aanbod het die Amerikaners ’n reuse-teenaanbod gemaak. Nou, ná Suid- Afrika se tweede aanbod, is daar volgens hom steeds ’n beduidende gaping. Desondanks glo hy daar is danksy die besoek vordering gemaak.
Die afvaardiging het met ver- skeie partye gesprek gevoer, ook die twee senatore wat hulle aktief beywer om Suid- Afrika weens die tariewe uit Agoa te hou.
“Ons het aan hulle verduidelik dat Suid- Afrika sosiaal- ekonomiese probleme het en dat groter invoer tot groter werkloosheid sal bydra. Ons moet ’n punt vind wat gemaklik vir albei partye is.”
MIDDELPUNT
Lovell sê die hoenderbedryf is bereid om toegewings te maak, maar dit moenie die bedryf doodmaak nie: “Die vraag is waar die middelpunt tussen die partye is.” Volgens hom is die grootte van die Suid- Afrikaanse mark vir hoendervleis beperk weens verbruikers se besteebare inkomste. Enige toegewing wat tot groter invoer lei, sal dus vir die plaaslike bedryf ’n nadelige invloed op pryse hê.
Lovell sê hoewel Agoa baie belangrik is vir die Suid-Afrikaanse motorbedryf, is die landbou óók belangrik: “Albei partye moet redelik wees. Die gedagte is dat die twee bedrywe ’n skriftelike ooreenkoms moet bereik, wat dan as ’n aansoek by die Kommissie vir Internasionale Handelsadministrasie (Itac) ingedien word.”
Mnr. David Wolpert, uitvoerende hoof van die Assosiasie van Vleisinvoerders en -uitvoerders (AMIE), sê egter die plaaslike pluimveebedryf kan nie die hele Agoa- proses gyselaar hou nie: “Die Suid- Afrikaanse nywerheidsbedryf kan eenvoudig nie bekostig om Agoa se ekonomiese voordele te verloor nie.
“Duisende plaaslike werkgeleenthede is weens die eng belange van een rolspeler op die spel.” – CARIEN KRUGER