70 JAAR GELEDE
’n Gebrek aan waterboormasjiene beteken gronderosie in die Karoo, het mnr. H. Barnardt van Willowmore op die Middellandse landboukongres gesê. Erosie word grotendeels veroorsaak deur diere wat ver na water moet loop en die veld uittrap. Wanneer militêre boormasjiene beskikbaar gestel word, behoort voorkeur aan die Karoostreke gegee te word.
Die vervaardiging van kunsbotter kan ’n gevestigde belang word en ’n wesenlike gevaar vir die suiwelbedryf inhou, het sprekers op die kongres van Noord-Kaaplandse boere aangevoer. In ’n beskrywingspunt is gevra dat die regering die vervaardiging van kunsbotter moet belet of ten minste moet beperk.
’n Plaaswerker is op Boshof ter strafsitting verwys op aanklag van poging tot moord op sy werkgewer, mnr. A.J. Joubert, ’n bekende boer van die distrik. Mnr. Joubert het melk gedrink waarin na bewering dipstof gegooi is.
Die belange van die twee Por- tugese provinsies Angola en Mosambiek word geraak deur die Conroy-ekspedisie se oorweging dat die lope van die Kunene- en Choberivier verander word ten einde die Kalahari te besproei. Portugal behoort daarom in die ekspedisie verteenwoordig te word, skryf die vooraanstaande Portugese koerant Diario de Noticias.
Mnr. A.D. Malan, ’n boswagter, en agt werkers is dood weens brandwonde wat hulle opgedoen het toe hulle ’n bosbrand in die Brooklands-staatsreserwe naby Sabie bestry het. Die brand is vermoedelik deur twee kinders gestig.
Mnr. Andries Steyn, Volksraadslid vir Kroonstad, is op die afgelope vergadering van die Mielieraad tot voorsitter verkies. Hy is in die plek van mnr. Piet Hugo van Vryburg wat bedank het.
Onderstepoort, die veeartsenykundige instituut by Pretoria, berei hom voor vir die vervaardiging van entstof teen lamsiekte by klein- en grootvee. Inenting sal diere net so goed teen dié dodelike siekte vrywaar as teen spons- en miltsiekte.