VERANDERENDE KLIMAAT VEREIS ANDER DIERE

Hoër temperature en laer, wisselvalliger reënval gaan in die toekoms vereis dat beeskuddes oor groot dele van SuiderAfrika by dié klimaatsverandering aanpas.

Gemiddelde temperatuurstygings, wat van 0,5 ºC aan die kus tot 3 ºC in die ooste van Namibië tot die weste van Botswana wissel, word voorspel. Klimaatsverandering behoort ook meer hittegolwe en droër weer na dié streek te bring, behalwe in die sentrale dele en Oos-Kaap, wat volgens die vooruitskoumodelle natter kan word.

Die verwagte afname in die reënval oor die oostelike dele van Limpopo en Mpumalanga, die Suidwes-Kaap en die Kaapse suidkus is betekenisvol: Meer as 40 mm per jaar. Voorts word ook verwag dat die reënval ál wisselvalliger gaan word.

Veeboere sal hulle moet inrig deur onder meer diere te teel wat vir hoër temperature aangepas is, sê dr. Michiel Scholtz, veekundige van die Landbounavorsingsraad se Instituut vir Diereproduksie. “Vleisbeeste se normale gemaksone is tussen 4 ºC en 24 ºC. As temperature hoër is, is dit belangrik om met beeste te boer wat hittestres kan weerstaan.” As die temperature te hoog raak, verlaag beeste hul voedingsinname om die hitte van die verteringproses af te skaal. Hulle wei nie in die warm middel-vandie-dag-temperature nie en omdat hulle sweet, verhoog hul waterinname.