INTERNASIONALE KATOENMARK
Hoewel die wêreld se hektare onder katoen die afgelope dekades bykans stabiel gebly het, het die produksie om verskeie redes aansienlik verhoog. Die wêreldprys van katoen ry betreklik wipplank vanweë die effens verbeterde vraag na die vesel, maar dis die groot voorraadhouding wat weer die prys benadeel.
Die Internasionale Katoenadvieskomitee (ICAC) verwag dat die wêreld se katoenaanplanting in 2015/’16 met ongeveer 7% sal afneem, hoofsaaklik weens laer katoenpryse.
In Indië, die wêreld se grootste katoenproduserende land, word ’n afname van 2% verwag, terwyl produksie in China met ongeveer 16% in 2015/’16 kan afneem. Die aankondiging van ’n kleiner Chinese subsidie vir vanjaar speel in laasgenoemde afname ’n groot rol.
Die ICAC raam dat katoenproduksie in die ander twee groot katoenproduserende lande, Amerika en Pakistan, onderskeidelik met 14% en 11% sal afneem. In Amerika ondervind die verre westelike katoenstreek ernstige droogtetoestande terwyl oormatige reën in Texas die aanplant van die gewas vertraag.
Die ICAC verwag dat die wêreld se katoenverbruik met 3% in 2014/’15 en met nog 2% in 2015/’16 sal toeneem. Hoewel China se verbruik met 2% in 2014/’15 herstel het ná vier agtereenvolgende seisoene van afname, is dit steeds 20% minder as die rekordvlak van vier jaar gelede.
Volgens die ICAC is dit onwaarskynlik dat China se katoenverbruik in 2015/’16 enige groei sal toon. Pleks daarvan word verwag dat katoenverbruik in nabygeleë lande, soos Indië en Pakistan, sal aanhou groei met ’n geprojekteerde toename van ongeveer 3% in 2015/’16.
Nadat dit met 15% in 2014/’15 afgeneem het, verwag die ICAC dat die wêreldkatoenhandel in 2015/’16 sal herstel en met ongeveer 2% tot 7,7 miljoen ton sal toeneem (invoer buite China sal na verwagting met 3% toeneem). Volgens die ICAC sal Bangladesj, Viëtnam en Indonesië in 2015/’16 die grootste katoeninvoerders buite China wees as gevolg van die volgehoue groei in hul spinbedrywe wat hoofsaaklik van ingevoerde katoen afhanklik is.
Hoewel die wêreld-eindvoorraad van katoen na verwagting vanjaar die eerste keer in vyf jaar sal afneem met 5% tot 20,8 miljoen ton, sal die hoë voorraadvlakke steeds ’n neerdrukkende uitwerking op wêreld-katoenpryse hê.