Sertifisering van kunsmisgeriewe
Die Kunsmisvereniging v a n S u i d e r Af r i k a (Fertasa) het aan die begin van vanjaar ’ n sertifiseringskema vir kunsmisgeriewe i ngestel. Die eerste sertifikaat is in April op Fertasa se jaarlikse kongres in Somerset-Wes aan Metson-vervaardiging oorhandig.
Die hoofdoel van die sertifiseringskema is om die verantwoordelike en volhoubare gebruik van kunsmis te bevorder. Die skema sal verseker dat vervaardigers kunsmis produseer wat voldoen aan die regulasies van Wet 36 van 1947 en dat alle wetlike vereistes tydens die produksie, opberging, vervoer en toediening daarvan nagekom word.
Hierdie inisiatief bevestig Fer- tasa en sy lede se verbintenis tot die bevordering van die integriteit van en die vertroue in die kunsmisbedryf.
Fertasa se sertifiseringskema ondersteun die Departement van Landbou se beleid van selfregulering vir die kunsmisbedryf.
Fertasa het ’ n onafhanklike derde party, AfriCompliance, aangestel om die geriewe van Fertasa-lede na te gaan.
Fertasa se gedragskode is tot ’n vraelys uitgebrei wat gebruik word om die lede te beoordeel. Dit dek gehalte, veiligheid, gesondheid, omgewingsimpak en die vereistes van die wet. Fertasa reik ’n sertifikaat uit wanneer AfriCompliance bevestig dat aan die vereistes voldoen word.
Hoewel sertifisering vrywillig is, word lede van Fertasa aangemoedig om deel te neem en die reg te bekom om “Fertasa se seël van goedkeuring” op hul dokumente en kunsmissakke te vertoon. Die sertifiseringsiklus sal al om die derde jaar herhaal word.
“Ons is opgewonde oor die maatstawwe wat in werking gestel word om die integriteit en beeld van die kunsmisbedryf te verbeter,” sê mnr. Adriaan de Lange, voorsitter van Fertasa.
“Ons toekoms hang af van die volhoubaarheid van gewasproduksie, wat ’n funksie van grondvrugbaarheid is. Fertasa en sy lede streef daarna om alle aspekte van kunsmis in die volle waardeketting tot voordeel van die landbousektor te verbeter.”