VOERBEDRYF HELP STAAT NOU MET REGISTRASIES
DIE
staat en die veevoerbedryf het nader aan mekaar beweeg vir die registrasie van nuwe veevoerprodukte deur ’ n ooreenkoms aan te gaan waarvolgens die Vereniging van Veevoervervaardigers (Afma) vanaf 1 Julie help met nuwe aansoeke.
Mnr. De Wet Boshoff, uitvoerende direkteur, het gesê ’n lessenaar is ingestel waar lede hul aansoeke kan indien sodat dit eers vir korrektheid en volledigheid nagegaan kan word. Afma dien dan die aansoek by die registrateur in en doen weekliks navraag oor die vordering.
Mnr. Jonathan Mudzunga, registrateur van die Wet op Misstowwe, Veevoere, Landboumiddels en Veemiddels by die Departement van Landbou, Bosbou en Visserye, het op ’n vergadering in Pretoria gesê dit sal help om die agterstand met die registrasie van veevoere ingevolge Wet 36 van 1947 weg te werk en die nuwe aansoeke vinniger te verwerk.
Hy het op ’n vraag van Landbouweekblad gesê dit duur tans sowat twaalf maande om ’n aansoek goed te keur. Hy voorsien dit sal tot vier maande verkort kan word sodra die agterstand iets van die verlede is.
Die veevoerbedryf en st aat het dieselfde doel, naamlik beter voedselproduksie en veilige voedsel. Daarom is die bystanddiens verwelkom. “Die staat kan nie al die werk alleen doen nie. Nou kan ons saamwerk,” het hy bygevoeg.
Die misstofbedryf het ’n soortgelyke stelsel begin en dit het die wagtyd vir nuwe registrasies van twaalf tot drie maande verkort.
Mudzunga het gesê die voorgenome nuwe voerwet kan die druk verder verlig. Kommentaar sal eersdaags gevra word en dan kan die wet deur die fases van voorbereiding en bekendmaking gaan. Daarvolgens sal voerfabrieke hulself kan registreer en nie langer bepaalde produkte nie.
Mnr. Loutjie Dunn, voorsitter van Afma, het gesê die agterstand met registrasies raak groter weens die toenemende getal vervaardigers en aansoeke en ’n gebrek aan genoeg personeel by die registrateur. Dit frustreer lede. Minstens die helfte van alle aansoeke is boonop onvolledig, wat die proses verder vertraag.
Me. Liesl Breytenbach, bestuurder van tegniese en regulatoriese sake by Afma, het gesê die diens is uitsluitlik vir lede van Afma. Hulle betaal R1 020 per aansoek. Mnr. Thami Khetani is aangewys om die lessenaar te beman.
– ‘Die staat kan nie al die werk alleen doen nie. Nou kan ons saamwerk.’
Die RSA Groep, wat 30 jaar gelede deur mnr. Mike Loutfie begin is, het onlangs hul nuwe, groter vloer by die Kaapstadse Mark in Epping aan produsente en kopers bekend gestel. Die manne wat die lint gesny en die vloer geopen het, is (van links) mnr. Johan Koen, finansiële direkteur van die groep, dr. Nawah Nagia, voorsitter van die Kaapstad Mark, mnre. Peter Misselbrook en Jaco Oosthuizen, onderskeidelik voorsitter en besturende direkteur van die groep. Die RSA Groep het in 2014/’15 bykans 602 000 ton vars vrugte en groente op markte in Johannesburg, Tshwane, Durban, Bloemfontein en Kaapstad verkoop. FOTO’S: AMELIA GENIS Op die bekendstelling van die RSA Groep se groter vloer by die Kaapstadse Mark is, van links, mnre. Allan Dalbock, ‘n boer van Prospect Tomatoes in Oos-Londen, Grant Smuts van die boerdery Smuts-broers op Robertson en Jandri Duvenage, besturende direkteur van die uitvoermaatskappy RSA Internasionaal. Die RSA Groep is die grootste varsprodusentemarkagent in die Suidelike Halfrond wat die kommissieverkoopstelsel gebruik.