MARTJIE MALAN
Met haar stringetjie pêrels wat sy by haar ma, Teresa, geërf het byna altyd om haar nek, het Martjie Malan die Koekedoor- kombuis aan die brand gebak. Die Chanel-model, het die produksiespan haar genoem. Of dit nou goue skilferkors, smeltsagte makrolletjies of romerige bakkersvla is, dié selfopgeleide fyngebaksjef laat mense swymel met haar lekkernye – ook in haar koffiewinkel op Stellenbosch. Met Martjie se bakwenke sal dit met jou goed gaan in die kombuis! Ek het in Pretoria grootgeword, maar woon al 12 jaar op Stellenbosch saam met my man, Christo, en kinders, Teresa (4) en Ockie (1 jaar en 8 maande). Ek was voorheen ’n onderwysers, maar het myself deur boeke, die televisie en webtuistes leer bak. Ek bak al my lewe lank. Ek dink plaatkoekies en Franse eierbroodjies was van die eerste goed wat ek leer bak het.
Waar kom jou liefde vir bak vandaan?
My oumas, ouma Hyla (94) en ouma Martjie (reeds oorlede), is my rolmodelle vir bak en kosmaak. Ek het by my ma, Teresa, geleer om perfeksionisties in die kombuis te wees. Haar koekies was altyd presies in rytjies, baie netjies en elkeen presies dieselfde.
Wat is jou gunsteling-winterpoeding?
Definitief gebakte lemoenpoeding. My ouma Hyla het dit altyd met ’n lieflike lemoenstroop gemaak, so dis lekker vogtig. Dis heerlik saam met selfgemaakte vla. Ek maak dit vandag nog, maar pas soms die resep aan en gooi ’n bietjie amandelmeel by.
Wat is jou beste kindertydse herinnering aan ’n lekker warm, gebakte poeding?
My ma is ongelukkig reeds oorlede, maar sy was verskriklik lief vir souskluitjies. Ek kan nog duidelik ons Sondag-maaltye onthou met lamsboud, hoender en groente en dan altyd souskluitjies vir nagereg. Sy het sponskluitjies gemaak.
As ek sê malvapoeding, waaraan dink jy?
’n Lekker karamelsous en ryk smake. Ek is nie mal oor droë kos nie, daarom is ek so lief vir ’n warm poeding. Ja, natuurlik! Ek haat dit as iets verkeerd loop. My arme man! Dit is vir my baie erg om kos te mors, daarom probeer ek dit altyd op ’n ander manier voorsit. As ’n koek byvoorbeeld effens ingeduik het, sal ek dit met versiersuiker of bessies en aarbeie toepak.
Sonder watter drie bestanddele kan jy nie winterpoedings maak nie?
Botter, room en enige sitrus.
Wat is jou beste wenke vir ’n goeie winterpoeding?
Dit moet ’n lekker karamelsous of stroop hê. Maak seker jou suiker en botter is goed verroom voor jy die eiers byvoeg, want dit maak die poeding lekker lig . Hou jou baktyd mooi
dop sodat jou poeding nie droog bak nie.
En wenke vir fyngebak?
Meet en weeg jou bestanddele noukeurig en gebruik goeie en vars bestanddele. Ek werk baie op intuïsie, so vertrou jou instink. As jy dink jy het dit genoeg geroer, dan is dit genoeg, of as jy dink jou pan is te vol, dan is dit tien teen een te vol.
Maak jy altyd jou eie vla, of kroek jy ook soms met ’n gekoopte boksie?
Ek maak graag my eie vla, maar ek het ook al lekker vars vla in boksies gekoop. As jy jou eie vla kook, onthou om altyd ’n bietjie warm melk by die eiermengsel te gooi en roer dit aanhoudend.
Niël Stemmet is ’n skrywer, ontwerper, kok, spreker en gastehuiseienaar. Sy boeke oor nostalgie-kos, Sout + Peper en Agter + Blad, is versamelstukke. Hy skryf nou maandeliks vir Landbouweekblad. E-pos-adres: