LLBBWW | VAN ORALOOR BOKHAARBEDRYF WIL WERKERS BEMAGTIG
DIE
bokhaarbedryf gaan opnuut probeer om sy plaaswerkersvereniging oor die hele produksiegebied op dreef te kry, het mnr. Cobus de Klerk in sy voorsittersrede op die kongres van die SASKV op Graaff-Reinet onderneem.
Hy het benadruk dat dit nie as ’n vakbond gesien moet word nie, maar een waar werkers die geleentheid kan kry om bydraes tot die bedryf te lewer. Dit sluit in skeeropleiding, gevorderde klasseringkursusse by makelaars, die bestuur van probleemdiere en die versorging en beslaan van perde. Daar gaan ook gepoog word om werkers se bestuursvaardighede te ontwikkel en met vergaderingprosedures vertroud te maak.
Volgens De Klerk is die nuwe beleid van die bemagtigingstrust ook besig om welslae op te lewer. Twee kommersiële kuddes vir swart boere is reeds gevestig. By Doornrivier, Somerset-Oos, het die begunstigdes reeds 500 kapaters in die vorm van ’n rentevrye lening ontvang. Op Weltevrede by Long Hope is 298 ooie en 9 ramme aan ’n familie oorhandig. Verskeie kortkursusse is ook op die Jansenville- proefplaas vir werkers aangebied. Die trust stel ’n kurrikulum saam om studente wat die kursusse suksesvol voltooi, te akkrediteer. Die bestuur van die vereniging is vergroot om die voorsitter van die plaaswerkersvereniging en ’n opkomende, kommersiële produsent te huisves.
KOMMUNIKASIE
Weens die onbetroubaarheid van die posdiens gaan die vereniging hom op digitale kommunikasie toespits.
De Klerk het die samewerking van alle belanghebbendes in die bedryf geprys. Hy het verwys na die brand wat Paassondag ’n groot gedeelte van die Stucken-groep se Gubb & Inggs-aanleg op Uitenhage in die puin gelê het. “Belanghebbendes het dadelik ruimte- en verwerkingsgeriewe aan die groep beskikbaar gestel.”
PRYSE
Hy het gesê hoewel die gemiddelde markaanwyser vir sybokhaar vir die 2015-somerseisoen net R191,58/kg was, talle boere meer as R260/kg vir hul skeersels ontvang het. Die boere wat die beste gevaar het, was mnre. Billy en Fred Colborne van Willowmore wat gemiddeld R288,33/kg gerealiseer het. – THEUNS BOTHA
Die Zandberg-trustees en kollegas met hul seremoniële dividendtjek van R750 000. Van links is mnr. Abraham van Rheenen, Zandberg-direkteur, mnr. Erard Lombard, mentor, me. Johanna Jooste, voorsitter van die trust, me. Medelene Beukes, trustlid, me. Johanna Cupido, Zandberg-direkteur, dr. André Neethling, besturende direkteur van Suiderland Plase, me. Lorenda Koopman, Zandberg-direkteur, mnr. Petrus Beukes, trustlid, mnr. Kevin October, trustlid, en mnr. Detré Baard, hoofbestuurder van die Welverdiend-boerdery en mentorboer van Zandberg. FOTO: VERSKAF