PARTYE ONDERHANDEL NOG OOR KORINGPLAN
DEELNEMERS aan die koringwaardeketting onderhandel nog oor planne en veranderinge om die bedryf se vooruitsigte te verbeter, maar dit duur lank om konsensus te kry, sê mnr. Allan Bishop, voorsitter van die Koringforum.
Die forum is ’n vrywillige organisasie vir alle deelnemers in die koringbedryf wat by die Nasionale Bemarkingsraad geregistreer is.
“Ons het van meet af aan afhandelingsdatums gestel, maar dit is ’n lang proses om eenstemmigheid by almal te kry. Almal stem egter saam dat die veranderinge teen einde Desember 2016 afgehandel moet wees,” sê Bishop.
Die proses om die koringbedryf te “laat herleef”, laat skynbaar geen steen onaangeroerd nie.
Sekere veranderinge is “makli- ker”. het byvoorbeeld in April berig oor die samewerking tussen Graan SA, die Universiteit Stellenbosch en die saadteelinstellings, Sensako, Pannar en die Kleingraaninstituut van die Landbounavorsingsraad, om die voorteelproses aan die gang te kry wat daarop gemik is om kultivars met ’n hoër opbrengspotensiaal te ontwikkel.
Voorgestelde aanpassings aan graderingsregulasies, graaddifferensiale en die vrystellingskriteria vir koringkultivars is ingewikkelder en het verreikender gevolge. Bishop sê egter alle partye is bereid om oplossings te kry.
NUWE GESPREKSFORUM
Wat die proses verder uitrek, is die feit dat die gidskomitee van die Koringforum gevoel het dat regsadvies en die toestemming van die Mededingingskommissie nodig is omdat daar redelike groot veranderinge kan kom ten opsigte van veral die basisprys en graaddifferensiale.
Bishop sê die Koringforum het ook met die Departement van Landbou, Bosbou en Visserye vergader om die saak te bespreek. “Ons bring ’ n gespreksforum tussen die koringbedryf en die departement op die been wat gereeld sal vergader om kwessies in die bedryf te bespreek en aanbevelings deur te gee aan die direkteur-generaal en die Minister.”
Die Koringforum se aktiewe lede is Graan SA, die Verenigi ng van Veevoervervaardigers ( Afma), die Departement Landbou, Bosbou en Visserye, AgbizGrain, die kommoditeitsafdeling van die JSE, die Meulenaarskamer, die Bakkerskamer, die Suid-Afrikaanse Vereniging van Graan- en Oliesaadhandelaars ( Sacota), die Suid- Afrikaanse Nasionale Saadorganisasie (Sansor) en die Nasionale Verbruikersunie (Sancu).