NUWE, VEILIGER SKEERKAM
’n Nuwe skeerkam wat genoeg wol op die skaap agterlaat om die dier in koue toestande te beskerm, is pas deur die landboumaatskappy BKB uit China ingevoer en landwyd getoets. Mnr. Johannes Pienaar, hoof van BKB se skeerdiens op Zastron, sê hulle is tevrede met die voorlopige resultate.
Die nuwe kam pas tussen ’n somer- en ’n winterkam in.
Die kam se funksie is drieledig. Dit laat genoeg wol op die skaap agter om dit in koue toestande te beskerm, die skape doen minder skeerbeserings op en dit sorg vir ’n gladde, afgeronde voorkoms.
“Dit laat ’n betreklik lang wollaag op die skaap se vel sonder om onegalige skeerhale agter te laat,” sê hy.
Een van die voordele van die nuwe kam is dat skeerders wat die kam slyp, nie die tande ook dunner en skerper maak nie. Beserings word dus beperk.
Die tande van die nuwe kam, wat as die hoogloop- kam bekend staan, is effens na bo gebuig. Dit laat ’ n bykomende wollaag van sowat 7 mm agter, teenoor die ou kam waarvan die punte mettertyd baie skerp kan raak en beserings kan veroorsaak.
BKB het die kamme op ’n onlangse besoek aan China bekom met die oog daarop om gaandeweg die handskeer van skape uit te skakel.
Mnr. Isak Staats, hoofbestuurder vir wol en bokhaar by BKB, sê ingevolge die maatskappy se beleid oor skeeropleiding en die indiensneming van ál meer plaaslike skaapskeerders word groter klem op veilige skeermetodes en -hulpmiddels gelê.
“Vir BKB is die welstand van skape baie belangrik. Ons probeer om deurlopend nuwe metodes te vind om stres en beserings in die skeerproses te verminder,” sê hy.
Hy voeg by dat die skeeraksie met die nuwe kam vir skeerders ietwat anders is en dat dit ’n aanpassingstydperk kan verg.
– JOHAN NORVAL