SÓ DOEN DIE JORDAANS DIT
Om as familie saam te boer, is nie aldag maanskyn en rose nie. Mnr. Andrew Jordaan (62) van die Spekboomberg-boerdery by Cradock en sy drie seuns, Wilhelm (38), Ginkel (36) en Andrew jr. (31), het ’n familietrust gevorm en kry dit reg om dit in harmonie te doen. Hier is hul resep: ■ Elke seun het ’n afdeling van die boerdery wat binne sy belangstellingsveld lê, en waarvoor hy verantwoordelikheid neem. Wilhelm behartig die gesaaides, besproeiing en instandhouding van die werktuie, Ginkel sien om na die melkery en Andrew jr. is by die skaapboerdery betrokke. Andrew sr. is oorhoofs by ál die vertakkings betrokke, maar sy groot liefde is die Merino’s en die stoetery in besonder. ■ Die boekhouding van elke afdeling word afsonderlik gehou. Dit help om aan te toon watter afdeling onder- of oorpresteer. ■ Hoewel al die seuns getroud is, probeer hulle so dikwels moontlik saam ontbyt op die familieplaas te geniet. Om die tafel word informeel oor elkeen se dagtaak gesels. ■ Minstens een keer per week word ’n formele vergadering gehou om die beplanning vir die volgende week te bespreek. Daar word ook by geleentheid gesamentlik besin oor die langtermyndoelwitte, soos waar spilpunte opgerig en nuwe kampe gespan moet word. ■ Die vroue van die seuns is nie regstreeks by die boerdery betrokke nie, maar ondersteun hul wederhelftes as dit by belangrike besluite kom. ■ Die familie glo dat daar op vergaderings na elkeen se standpunt geluister en dit gerespekteer moet word sonder om mekaar in die rede te val.
Informele gesprek.
Formele vergadering.
Vroue se rol.
Respek.