SUIDELIKE HALFROND
Chili het ’n normale vrugte-oes gehad. Sowat 5 miljoen basiese kartonhouers perskes is geoes. Dié land is die markleier wat perske-puree betref. “Chili begin vir Suid-Afrika ’n bedreiging word. Sy regering is ten gunste van die landbou en Chili begin Suid-Afrika se tradisionele markte binnekom,” sê mnr. Wiehahn Victor, uitvoerende hoof van die Inmaakvrugteprodusentevereniging.
Argentinië het ’n normale oes gehad ná ’n paar swakker jare. Sowat 5 miljoen basiese kartonhouers perskes is geoes, maar min appelkose en pere is gepluk. Dié land voorsien hoofsaaklik in sy eie behoeftes, maar voer wél uit na sy buurlande, soos Brasilië en Uruguay.
Australië se inmaakbedryf taan geweldig en “is besig om uit die boom te val”. Sy boere voorsien hoofsaaklik aan sy eie markte, hoewel hy ’n bietjie pere uitvoer. Suid-Afrika voer vrugte uit na Australië, hoewel dit ook afgeneem het.
NOORDELIKE HALFROND
China is die grootste vrugteprodusent ter wêreld. Van 20 miljoen tot 25 miljoen basiese kartonhouers perskes, asook baie appels en pere, is vanjaar daar geproduseer. China voorsien hoofsaaklik vrugte vir sy eie reusebevolking van 1,3 miljard mense, maar voer ook bietjie vrugte uit na Amerika en Japan – sowat 4 miljoen basiese kartonhouers tot 5 miljoen kartonhouers. Suid-Afrikaanse perskes is baie gewild in China en tot 80% van sy perske-invoer kom uit Suid-Afrika.
Griekeland verwag dié seisoen 425 000 ton perskes, oftewel 12,5 miljoen basiese kartonhouers. Dit is 2% minder as die vorige seisoen. Die appelkoos-oes het met 15% gedaal weens swak vrugset. Sowat 40 000 ton appelkose is verwerk.
Spanje verwag 265 000 ton perskes, wat 3% meer is as die vorige seisoen. Die oes is egter 16% kleiner as sy gemiddelde oes op lang termyn. Spanje het egter 12% meer appelkose geoes, waarvan baie op die vars markte beland het.
Italië verwag om 63 000 ton perskes te oes, wat 3% meer is as die vorige oes. Die oes het egter met 31% gedaal teenoor die langtermyngemiddelde.
Amerika se perske- en peerpryse het dié seisoen vir die eerste keer in ’n lang tyd skerp gestyg. Hy verwag vanjaar ’n perskeoes wat 5,6% meer is. Sowat 95% van Amerika se vrugte word egter self verbruik. Die verwagting vanjaar is 12,5 miljoen basiese kartonhouers perskes, en 7,5 miljoen basiese kartonhouers pere. Die pluspunte vir Amerika se inmaakvrugtebedryf is dat sy produktiwiteit baie hoog is en die land ’n lae inflasiesyfer het. Die arbeidsituasie is ook aan die verbeter.
“Omdat die uitvoervraag groter is na groter vrugte, is baie boorde uitgedun om groter pere te kry, en dit het ’n uitwerking gehad op die geoeste tonnemaat.”
Om die Bon Chretien- bedryf in stand te hou, moet minstens 70 ha tot 75 ha jaarliks in die toekoms gevestig word, sê Wiehahn.