Nuwe melkbok-man wil boere betrek
Die nuwe voorsitter van die SA Melkboktelersgenootskap wil meer kommersiële boere by die organisasie betrek. Mnr. Donald Mouton, wat ook landgoedbestuurder by die kaas- en- wynplaas Fairview in die Wes-Kaap is, sê die genootskap is ’n klein organisasie met hoofsaaklik stoettelers as lede.
“Ons het ’ n melkbokrevolusie nodig,” het Donald voor die genootskap se jaarvergadering vroeër vandeesmaand op die Facebook- blad SA Milk Goat Breeders’ Society geskryf.
“Die boere moet opstaan, vergaderings bywoon, betrokke raak, leierskap toon.”
Donald het op die blad gevra wat boere pla. Daarop het me. Valerie Smith voorgestel dat daar meer interaktiewe kommunikasie deur die webwerf, Facebook en Twitter moet wees.
En me. Karen Serfontein het geskryf dat daar ’ n baie groot gaping tussen telers en hul verenigings aan die een kant en kommersiële boere en hul verenigings aan die ander kant is. “...dit is nodig om daadwerklik ‘common ground’ te vind tussen die (jammer as ek op tone trap) magtige telers en die armsalige boertjies,” het sy geskryf.
Donald se reaksie was: “Daar is nie ’n ding soos ’n magtige teler nie. Ons moet ons beywer om ’n diens aan almal te lewer.”
Me. Rina Belcher van die Belnori- boetiekkaasmakery in Gauteng het gesê talle klein kommersiële boere is in werklikheid stadsmense wat leiding nodig het. Baie is egter teleurgesteld nadat hul gebrek aan ervaring en kennis uitgebuit is. Van hulle het nou netwerke op die been gebring om mekaar te help.
“Dat daar mense is wat bereid is om betrokke te raak en dinge te doen, kan ek nie ontken nie (ek is een van hulle), maar dit is soos om te probeer om die Voor- trekkermonument eiehandig te skuif. Niks wil beweeg nie,” het sy op die blad geskryf.
Vir haar is dit duidelik dat die telersgenootskap se aandag heeltemal in beslag geneem word met skoudiere en in ’n mindere mate met die voorsiening van diere vir, of hulp aan, kommersiële ondernemings.
NUWE WENDING NODIG
Donald sê eens is die melkbokbedryf oorheers deur mense wat vir ’n stokperdjie of met die oog op skoue betrokke was, maar dit het nou ’ n kommersiële bedryf geword. Hy het aan Landbouweekblad gesê vir hom as voorsitter is die uitdaging om kommersiële boere as lede van die genootskap betrokke te kry.
Dit blyk dat boere verwag dat lede van die genootskap plaasbesoeke moet doen om hulle met raad en daad te bedien. “Die nuwe raad het besluit nuwe lede sal binne ses maande ná aanslui- ting ’n gratis besoek ontvang.”
Dit is vir hom baie belangrik om kommersiële boere betrokke te kry omdat hy bekommerd is dat die teling van melkbokke andersins skade kan ly.
Navorsing deur die Universiteit van Pretoria het getoon dat inteling reeds gebeur en dat die genepoele beperk is.
Die genootskap het op sy jaarvergadering besluit dat alle ramme wat vanaf die 2016-dektyd vir stoetteling gebruik gaan word, se DNS geregistreer moet word. “Ons wil seker maak as ’n bokboer in die toekoms ’n teeldier koop, is hy verseker dat hy kry waarvoor hy betaal.”
Donald wil verder die provinsiale en nasionale departemente van landbou meer betrokke kry omdat hy melkbokboerdery as baie geskik vir plattelandse en beginnerboere beskou.
Met die hulp van die Wes-Kaapse departement van landbou is ’n suksesvolle inligtingsdag verlede jaar op die plaas Sandringham by Stellenbosch aangebied, wat vanjaar herhaal gaan word.
Donald hoop soortgelyke dae kan elders in die land aangebied word met die hulp van borge en ander hulpbronne. Die ander raadslede van die genootskap is mnre. Koos van der Westhuizen, ondervoorsitter, Kenny van der Merwe, Mervin Swart (lewenslange erevoorsitter), Charles Malherbe, Francois Smit en Walter Curlewis.
Vir talle mense was hul melkbokke ’n stokperdjie. Stappe word nou gedoen om kommersiële boere by die melkbokbedryf betrokke te kry.