Dié week in die landbou

MELKBOERE IN VS LY

Melkboere van die Vrystaat word swaar getref deur die ooraanbod en lae pryse van melk. Sommige melkkopers in die Vrystaat het boere laat weet hulle gaan melkwinning vanaf hul plase in die volgende twee maande staak. Nuwe kopers moet vir sowat 130 000 liter melk per dag gevind word. Daarbenewens het die Oos-Kaapse melkverwerker Woodlands aangekondig dat hy melkboere vanaf September vanjaar 50c/liter minder gaan betaal.

Lees berigte op bl. 14. MPO

FOTO: WWW.THINKSTOCK.COM

WERKERS IN GEVAAR

Altesame 15 plaasmoorde is in die eerste helfte van die jaar in die Vrystaat aangeteken. Volgens statistieke van Vrystaat Landbou (VL) en VKB se veiligheidsles- senaar, was plaaswerkers die slagoffers in tien van daardie moorde. Volgens mnr. Tommie Esterhuyse van die VL is die veiligheid van plaaswerkers ’n groot bron van kommer. As plaaswerkers vermoor of in so mate beseer word dat hulle nie meer kan werk nie, het dit ’n impak op armoede in die gemeenskap en die produksie op die plaas.

AUSSIE-DEURBRAAK

Australië is die eerste land ter wêreld wat lewende slagen voerkraalbeeste na China kan uitvoer. Mnr. Barnaby Joyce, Australiese minister van landbou, sê Australiese en Chinese veeartsenykundige owerhede stel ’n ooreenkoms op oor die sertifikasievereistes vir dieregesondheid. Die Australiese Beesraad sê die ondertekening van die protokol vir beesgesondheid met China is ’n beduidende mylpaal. Volgens dié raad het die mark in die afgelope ses jaar verdubbel en sal hul verhouding met Chinese kliënte aanhou groei, wat ’n beter inkomste vir beesboere en meer as 10 000 nuwe werkgeleenthede kan beteken.

LEWERSLAK-GEVAAR

Boere moet te alle tye waaksaam wees teen parasiete, selfs in die winter. Die persepsie dat besmetting nie in die winter voorkom nie, is verkeerd, sê dr. Faffa Malan, bestuurder van die Herkouerveterinêre Vereniging van Suid-Afrika. Lewerslakke en peervormige lewerslakwurms kom veral in die wintermaande voor wanneer weiding skraps is en diere in vleie wei. Boere moet waaksaam wees vir kliniese tekens en aanvullende voeding toedien. Lees die volledige siekteverslag op bl. 99.

HULP SKEP PROBLEME

Die Regering se grondhervormingsbeleid skep meer probleme as oplossings, luidens ’n navorsingsverslag deur die Internasionale Arbeidsorganisasie. Volgens inligting wat oor die leef- en werkstoestande van plaaswerkers versamel is, het die staat se ingrype om plaaswerkers se lewensbestaan sedert 1994 te verbeter, grootliks misluk. Dit vreet aan boere se winste om aan wetgewing en beleid te voldoen. Al hoe meer boere gebruik stukwerkers met die gevolg dat al hoe minder plaaswerkers huisvesting kry en na informele nedersettings trek. Verder is bevind dat plaassubsidies tot 3% gedaal het en dat dié afname dit vir plaaslike boere moeilik maak om mee te ding teen ander lande wat wel subsidies ontvang. BDLIVE

MOT BAAN SY WEG

Die gevreesde Tuta absoluta, ’n tamatieblaarmynermot, beweeg al nader aan Suid-Afrika se grens. In tamaties kan die mot opbrengsverliese van tot 100% veroorsaak. Aartappelnavorsers is bekommerd dat hy dié bedryf ook kan skaad. Die voorkoms van dié mot is onlangs in Tanzanië bevestig en daar is gerugte dat dit ook reeds in Mosambiek en Zimbabwe voorkom. Motlarwes veroorsaak dat die blare uitdroog en vrek, en vrugte, soos tamaties, word onbemarkbaar. Die plaag versprei op saailinge en vrugte.

SOLDATE RED BEESTE

’n Hittegolf in Switserland het gemaak dat dié land se beeste hulp uit ’n onverwagte oord kry. Soldate van die Switserse weermag is opdrag gegee om aan die diere lafenis te bied teen die skroeiende hitte. Volgens ’n woordvoerder van die weermag het soldate agt opgaardamme in die Jura-berge opgerig wat water aan die beeste sal voorsien. Super Puma-helikopters sal ook water uit nabygeleë mere skep en na die weivelde neem. Telegraph

FOTO: WWW.THINKSTOCK.COM