Buitelandse beleggings: Versprei só jou risiko
ense belê hul geld in die buiteland – of oorweeg dit – om twee redes. Die eerste is die verspreiding van bates. Dit maak goeie beleggingsin om nie ál jou bates in een mandjie te belê nie. Die ander rede is meer politiek- emosioneel. Baie mense is besig om vertroue in die land te verloor en wil weet of hulle geld uit die land moet neem of plase verkoop en die geld elders belê.
Ek is ook bekommerd oor die situasie in ons land gegewe die Regering se rigtingloosheid, maar ek voel ook soos die bekende scenario- kommentator Clem Sunter: Hier is dinge wat stukkend is in ons land, maar dit kan reggemaak word. Dit is nog lank nie tyd om op te pak en weg te hol nie.
Dit gesê, kom ons kyk na die regte redes om in die buiteland te belê. Dit gaan nie net daaroor om ’n beter opbrengs te probeer kry nie. Dit gaan primêr oor die verspreiding van jou bates. Bateverspreiding gaan nie noodwendig keer dat jy geld verloor nie, maar dit kan help dat jy nie alles tegelyk verloor nie.
LAND VAN GELEENTHEDE ÉN RISIKO
Suid-Afrika is ’n ontwikkelende land. Enersyds hou dit goeie beleggingsgeleenthede in, soos ons nou al jare lank ervaar. Moet egter nie die risiko miskyk nie. Ons weet nie aldag watter rigting ons gaan inslaan nie. Is dit die vreugdevolle hoogtes in, of lê die depressiewe dieptes en wag?
Om jou geld in verskillende bateklasse te versprei, is altyd goed. Om dit terselfdertyd ook aan meer as een ekonomie bloot te stel, is goeie finansiële risikobestuur.
Nog ’n faktor is die wisselkoers. Mense vra gereeld wat die rand gaan doen. My raad is om nie speletjies te speel met verwagte wisselkoersskommelinge nie. Dis te emosioneel gelaai. Jy kan jou vingers lelik verbrand.
Beskou dit liewer as een van die risiko’s wat bestuur moet word. Dit kan help om jou beleggingsopbrengs te verhoog, of dit kan meebring dat jy finansieel beteuterd daarvan afkom. Ons kyk na ’n voorbeeld.
Gestel jy belê in ’n Amerikaanse aandeel ter waarde van $50 en die rand-dollar-wisselkoers op dié dag is R12. Dan kos die aandeel jou R600. Ná ’ n jaar verkoop jy teen dieselfde wisselkoers die aandeel vir $55. Jou beleggingsopbrengs is R660, oftewel 10%.
As die rand in dié tyd met 5% tot R12,60 per dollar verswak het, is jou opbrengs R693, oftewel 15,5%. Maar as die rand met 5% verstewig het tot R11,40, is jou opbrengs R627, oftewel net 4,5%. ’n Beweging van net 5% in die rand se waarde het ’n 55%-verskil na albei kante toe aan die opbrengswaarde van die aandeel gemaak.
Dit word dus as ’n volatiele belegging beskou. Dit beteken jy moet ’n aptyt vir risiko hê as jy in die buiteland wil belê en jy moet kyk na ’n tydshorison van minstens vyf jaar tot tien jaar.
BUITELANDSE BLOOTSTELLING
Daar is twee maniere om geld in die buiteland te belê. Die eerste is in rand-gedenomineerde buitelandse beleggingsfondse. Jy belê in rand en jy kry jou belegging terug in rand. Jy het nie regstreeks geld in die buiteland nie, maar deur die batebestuurder se ruiltransaksies kry jy buitelandse blootstelling.
Die ander manier is om regstreeks in die buiteland te belê. Jy neem werklik geld uit die land uit en hou dit byvoorbeeld in Amerika in dollar. Jy kan tot R4 miljoen ( per persoon bo 18 jaar) só wettig uit die land neem. Die buitelandse belegging is uiteraard nie uit jou boedel vir boedelbelastingdoeleindes nie. Al jou bates wêreldwyd word daarvoor in ag geneem.
Oorweeg beleggings in die buiteland om jou aan meer as een ekonomie bloot te stel. Suid-Afrika bied beleggingsgeleenthede, maar ook risiko’s.