Stryd om kopers vir melkboere te vind
NUWE melkkopers gaan moeilik gevind word vir boere wat aan ’ n Clocolan- depot in die OosVrystaat melk lewer.
Dié depot van Montic, die grootste koper in die gebied, sluit einde September.
Dit kom terwyl Suid-Afrika se melkproduksie vanjaar kwaai gestyg het. Invoer het egter ook baie gestyg weens lae internasionale suiwelpryse. ( Sien die berig hiernaas)
Mnr. Philip Swart, die bestuurder van lededienste van die Melkprodusente- organisasie (MPO), probeer die sowat 50 boere help wat deur die sluiting van die depot in ’n krisis gedompel word.
Hy raam die hoeveelheid melk wat ter sprake is, op sowat 120 000 liter per dag.
“As dit ’ n j aar gelede was, sou dit baie makliker gewees het. Ongelukkig het amper alle moontlike kopers genoeg boere wat melk lewer.”
Die boere wou as groep onderhandel, maar Swart het gesê dit sal beter wees om individueel kopers te probeer vind.
“Ons het nog nie baie sukses gehad om kopers te vind nie, maar die belofte is daar.”
VEREISTES
Mnr. Martin Swanepoel, uitvoerende hoof van Sontic, houermaatskappy van Montic en die Wes-Kaapse suiwelmaatskappy Sonnendal, het vroeër gesê baie van die boere wat aan die depot gelewer het, het nie die nodige sertifikate vir produksie nie en die melk voldoen nie aan stan- daarde nie.
Swart wil die sertifikate ’ n voorwaarde maak vir boere om kopers vir hul melk te vind en sê die kopers mag dalk ook ’n minimum hoeveelheid melk as voorwaarde stel.
Boere het op ’n vergadering verteenwoordigers gekies om met Sontic oor die pad vorentoe en agterstallige betalings te onderhandel.
BETALINGS
’n Boer het teenoor Landbouweekblad beweer van die bedrae is sedert Desember agterstallig. Mnr. Wayne van Biljon, uitvoerende hoof van Montic, sê egter die Desember-kwessie gaan oor Montic se welwillendheidsgebaar om boere se surplusmelk op te laai en hulle daarvoor te betaal as ’n mark vir die melk gevind kon word. Die afgelope Desember was dit egter onmoontlik weens die groot aanbod van melk in Suid-Afrika.
Van Biljoen het erken Montic skuld sommige boere nog ’n deel van hul geld vir lewering in Mei, maar hy sê dit sal binne die volgende paar dae betaal word.
Hy het benadruk dat Montic sy kontraktuele verbintenisse tot einde September sal nakom en boere sal betaal vir melk gelewer.
ROETE VERANDER
Mnr. Quentin Southey, uitvoerende hoof van die melkkoper Douglasdale, sê intussen ’n bewering dat dié maatskappy ’n roete in die Vrystaat beëindig het, is onwaar.
’n Roete moes wel verander word nadat ’ n boer daaraan onttrek het en die oorblywende hoeveelheid melk nie meer ekonomies haalbaar was om op te laai nie.
In die proses is enkele boere volgens hom kennis gegee dat hul melk nie meer gekoop sal word nie. – CARIEN KRUGER
‘Ons het nog nie baie sukses gehad om kopers te vind nie, maar die belofte is daar.’