Boeke

Twee boeke – een vir tienermeisies en een vir jonger kinders – help kinders om die lewe te verken en sy tergende vrae te beantwoord.

Lesse vir tieners, sonder ’n gepreek

Swemlesse vir ’n meermin deur Marita van der Vyver. Uitgewer: Tafelberg. Prys: R140. Aanhangers van Marita van der Vyver se boek Die ongelooflike avonture van Hanna Hoekom sal nie kan wag om die opvolg, Swemlesse vir ’n meermin, in die hande te kry nie. In dié boek skryf Hanna ’n lewensgids vir Ariel (haar babasussie wat aan die einde van Hanna Hoekom op ’n verlate berg gebore is). Dit is ter voorbereiding van Ariel se tienerjare.

Die afdelings in die boek lê klem op allerhande aspekte wat tienermeisies se lewens raak, soos vriendskappe en verhoudings, groepsdruk, probleme met ouers, voorkoms, jaloesie, selfbeeld, hoe om teleurstellings te hanteer . . . alles vanuit Hanna se verwysingsraamwerk en op haar ondervindings geskoei.

Marita van der Vyver weet waarmee tieners worstel en hoe om met hulle te kommunikeer. Enige tienermeisie sal hierdie boek geniet – omdat dit hulle nie sal laat voel of daar vir hulle gepreek word nie – en op die koop toe ’n paar waardevolle lesse daaruit leer.