GAMTOOSBOERE HOOR BINNEKORT OOR KWOTAS
BESPROEIINGSBOERE in die Gamtoosvallei behoort binne twee weke te hoor of waterbeperkings ingestel sal word, sê mnr. Pierre Joubert, hoofbestuurder van die Gamtoos-besproeiingsraad (GBR).
Die vlak van die Kougadam was teen druktyd 66,3%.
Joubert sê die GBR en Departement van Waterwese sal op 20 September besluit of beperkings ingestel gaan word.
“Wat my bekommer, is dat ons die afgelope vyf jaar bogemiddelde neerslae in die opvanggebied van die Kougadam gehad het, maar die vier laaste maande was die reënval ondergemiddeld. As dit die begin van ’n droogte is, is ons in groot moeilikheid. Waterwese wou op die vorige vergade-
ring in Junie al ’n beperking van 30% ingestel het.”
Joubert het besproeiingsboere aangeraai om goed na te dink oor watter gewasse hulle gaan plant en om verkieslik mielies te vermy.
MANDELA-METROPOOL
Hy het die aankondiging van mnr. Athol Trollip, nuwe uitvoerende burgemeester van die Nelson Mandela-metropool, verwelkom dat waterbeperkings in die stad binne twee weke ingestel kan word. “Ons is in die proses om ’n afspraak met hom te maak
om te praat oor die verkwisting van water in die metropool wat geregtig is op 28% van die water uit die Kougadam.
Die metropool het nie voldoen aan ’n versoek om al verlede jaar in Julie ’n waterbeperking van 15% in te stel nie.”
Joubert het vroeër gewaarsku indien die vlak van die Kougadam in so ’n mate daal dat waterbeperkings ingestel word en daar bewys kan word dat besproeiingsboere in die Gamtoos finansiële verliese ly, sy raad nie sal huiwer om eise teen die metro in te stel nie. –