MIELIEBOERE KAP GROEN LIG VIR GM MIELIES UIT VSA

DIE oopstelling van die SuidAfrikaanse mieliemark vir Amerikaanse geneties gemodifiseerde (GM) mielies gaan Suid-Afrikaanse mieliepryse laat daal en terselfdertyd die internasionale speelveld verder ongelyk maak vir plaaslike mielieprodusente.

Dít is die algemene gevoel oor die Departement van Landbou, Bosbou en Visserye se aankondiging dat ’n lys GM-tipe mielies (geel én wit) wat voorheen nie vir invoer uit Amerika goedgekeur was nie, nou invoerklaring gekry het.

Dit is slegs vir invoer as voedsel, voer en vir verwerking, en nie om plaaslik kommersieel geplant te word nie.

Die invloed van hierdie besluit op plaaslike produsentepryse is veral van onmiddellike belang vir Suid-Afrikaanse boere wie se reserwes deur die afgelope rekorddroogte uitgeput is en wat op die nuwe produksiejaar en goeie pryse staatmaak om finansieel weer te kan asem skep.

VOORRAAD

Mnr. Jannie de Villiers, hoof van die bedryfsorganisasie Graan SA, het in reaksie gesê daar is oorgenoeg mielies vir invoer in die wêreld, en enige goedkeuring van GM-tipes wat nie vir verbouing deur Suid-Afrikaanse boere beskikbaar is nie, plaas hulle op ’n ongelyke voet.

Hy sê handelaars het vroeër bevestig dat hulle reeds genoeg wit mielies elders bekom het om in die bemarkingsjaar 2016-’17 se geskatte plaaslike tekort te kan voorsien.

“As daar geen ander mielies as dié uit Amerika beskikbaar was nie, sou ons die druk vanaf verhandelaars en kopers kon verstaan, maar om die Amerikaanse boere ’n binnebaan te gee, lyk onregverdig,” sê De Villiers

Hy verduidelik dat Amerika normaalweg die eerste land is waar nuwe GM-tegnologie geregistreer word. Maatskappye doen dan aansoek om goedkeuring vir die uitvoer van hierdie tipes na ander lande. As dit nie in die ander lande vir algemene beskikbaarstelling geregistreer word nie, beteken dit plaaslike boere ding op ’n ongelyke speelveld teen die Amerikaanse boere mee, gegewe die tegnologiese ontwikkeling. Boonop het Amerikaanse boere nie net toegang tot beter tegnologie nie, maar hulle ontvang ook reusagtige subsidies van die regering.

ONGELYKE VOET

De Villiers voeg by dat die rekorddroogte nie as ’n nasionale ramp verklaar is nie. Uit ’n ekonomiese oogpunt bly Suid-Afrikaanse boere dus op ’n ongelyke voet as kommoditeitsklarings toegestaan word sonder dat die uitwerking daarvan op plaaslike produksie in ag geneem word.

“Kommoditeitsklaring behoort slegs in buitengewone omstandighede toegestaan te word en moet nooit die norm word nie. In die geval van ekstreme toestande, soos ’n bedreiging van Suid-Afrika se nasionale voedselsekerheidstatus en as die land as ’n rampgebied verklaar is, kan kommoditeitsklaring met spesiale invoervoorwaardes toegestaan word,” sê hy.

PRYSDALING

Mnr. Dirk Kok, woordvoerder van die Suid-Afrikaanse Vereniging van Graan- en Oliesaadhandelaars (Sacota), sê in sy reaksie die goedkeuring gáán plaaslike mieliepryse laat daal. Hy skryf prysdalings op die Safex-beurs sedert die goedkeuring algemeen bekend geword het, daaraan toe.

Teen begin Desember het SuidAfrika se totale mielie-invoer vir die eerste sewe maande van die bemarkingsjaar op 1,634 miljoen ton gestaan. Daarvan was byna 596 000 ton wit en byna 1,039 miljoen ton geel mielies.

Dit beteken sowat 30% van die verwagte jaartotaal wit mielies moet nog ingevoer word en 44% van die verwagte hoeveelheid geel mielies.

–

‘Om die Amerikaanse boere ’n binnebaan te gee, lyk onregverdig.’