REËN VAL STEEDS KOL-KOL
DIE somer se reënvalprentjie is tot dusver ’n gemengde een. Talle boere is dankbaar dat hulle ’n groener Kerstyd as verlede jaar binnegaan, maar in uitgestreke dele raak die voorsiening van weiding en water aan vee by die dag ’n ernstiger stryd.
Neerslae sedert begin Oktober was in ’n groot mate tot die oostelike produksiegebiede beperk.
In die omgewing van Bethlehem en Vrede in die OosVrystaat is verlede Maandag welkome neerslae van 41 mm tot 51 mm aangeteken, sê me. Alani Janeke, woordvoerder van Vrystaat Landbou.
Sy voeg by dat uiterste weerstoestande in dié provinsie heers. Sonneblomme staan byvoorbeeld reeds in die blom tussen Winburg en Senekal, en plasse water staan tussen Bethlehem en Warden. In die Suid-Vrystaat, by dorpe, soos Bethulie en Fauresmith, wag gemeenskappe egter steeds angstig op die eerste betekenisvolle reën van die huidige produksiejaar.
LA NIÑA WYK
In die grootste deel van die somersaaigebied was reën tot dusver voldoende om te kon plant, volgens mnr. Johan van den Berg, klimatoloog van Santam
Landbou. Noordwes is egter die uitsondering.
Op plekke in die westelike dele waar wel geplant is, het die jong gesaaides teen verlede week swaar getrek in die warm, winderige toestande en sonder die nodige opvolgneerslae.
Intussen het die swak La Niña wat middel November wêreldwyd aangekondig is, die wyk geneem. Seetemperature en ander toestande in die tropiese Stille Oseaan wat op die stand van dié klimaatverskynsel en haar broer, El Niño, dui, het sedertdien tot die neutrale fase teruggekeer.
Klimaatmodelle toon ook dat die kans skraal is dat La Niña in die komende maande sal herontwikkel.
Terwyl La Niña dikwels met bogemiddelde reënval in Suid-Afrika se somerreënstreke gepaardgaan en El Niño met ondergemiddelde neerslae, is ’n neutrale toestand meestal ’n aanduiding dat normale reënval verwag kan word.
–
Op plekke in die westelike dele waar wel geplant is, het die jong gesaaides teen verlede week swaar getrek in warm, winderige toestande en sonder opvolgneerslae.