Botha Roodt mik hoog met Tesourie-veteraan
MNR. Nhlanhla Nene, voormalige Minister van Finansies, sluit hom binnekort by die direksie van die markagentskap Botha Roodt aan nadat die gesiene swartbeleggingsmaatskappy Thebe ’n 51%-aandeel in dié onderneming bekom het.
Thebe is in 1992 deur swart sakelui gestig om agtergeblewe gemeenskappe op te hef.
Volgens mnr. Mokgethi Tshabalala, uitvoerende hoof van die Thebe-stigting, wat die maatskappy se opheffingswerk behartig, is Botha Roodt ’n belangrike aanwins vir Thebe om sy doel van marktoegang vir alle boere te verwesenlik.
“Toegang tot markte en markgereedheid is vir alle boere ’n stryd, maar veral vir opkomende boere,” sê Tshabalala.
Hy voeg by dat die Botha Roodt-transaksie baie kan help met tegniese ondersteuning en marktoegang. “Hierdeur kan ons ’n toenemende vraag na dié boere se produkte ontwikkel, maar ook wit boere aan markte blootstel waar hulle nie voorheen blootstelling gehad het nie,” sê hy.
“Die aanwins van ’n agentskap gee ons ook die geleentheid om noodsaaklike markintelligensie te bekom ten einde produksiebeplanning te kan doen en prysstrategieë beter te ontwikkel.”
DIREKSIE
Nene was van November 2008 tot met die 2014-verkiesing Adjunkminister van Finansies onder mnr. Pravin Gordhan en het laasgenoemde opgevolg as minister. Sy skielike afdanking verlede jaar het Suid-Afrika se finansiële stelsel miljarde rande gekos. Hy is nou ’n finansiële DAMVLAKKE SOOS OP 5 DESEMBER EN TOTALE REËNVAL IN NOVEMBER raadgewer by Thebe. “Nene sal ’n leidende rol speel as ’n nie-uitvoerende direkteur in die direksie van Botha Roodt. Sy ervaring sal van onskatbare waarde wees om Botha Roodt se sakebelange te laat groei en die onderneming reg te posisioneer om ons oogmerke te bereik,” sê Tshabalala.
GROEI
Tans doen Botha Roodt slegs op die Johannesburgse Varsproduktemark sake, maar ’n uitbreiding na Pretoria en Kaapstad en selfs Durban is op kort termyn in die vooruitsig. “Ons sal graag ook na uitvoergeleenthede vir ons produsente wil begin kyk. Thebe se doel is om so wyd as moontlik in die waardeketting betrokke te wees. Ons sal dus al hoe meer voedselverwerkingsgeleenthede ondersoek,” sê Tshabalala.
Volgens mnr. Chris Roodt, ’n direkteur van Botha Roodt, is dit ’n groot geleentheid vir die agentskap. “Die kontantinspuiting maak uitbreiding en beter bemarking moontlik, en met die huidige bestuurspan wat by die agentskap aanbly, is ons optimisties oor die toekoms.”
– Reënval (mm)