LANDBOUSKOOL ROL MOUE OP VIR BOERE
HUL mikpunt was om drie vragte voer vir Noord-Kaapse boere in te samel, maar binne ’n paar dae het die leerlingraad van die Landbougimnasium Augsburg in Clanwilliam met die hulp van plaaslike boere en ondernemings dubbel soveel ingesamel.
Nadat die skool se hoofseun, Lohan Toerien, op 28 November die plan aan een van sy onderwysers, mnr. JP van Rhyn, genoem het, het die skool se verteenwoordigende raad van leerders hul hart en siel in die projek gegooi.
Binne ’n paar dae het hulle 2 000 bale voer, 22 ton hawer, 4 ton mielies, 15 ronde bale, 15 ton gekapte koring, 10 bale gekapte lusern, 10 sakke lusernpille en 2 ton mieliemeel wat met kaf gemeng is, bymekaargemaak.
Dié voorraad het verlede Woensdag Noord-Kaap toe vertrek, danksy vervoer wat gratis deur plaaslike ondernemings verskaf is.
Van Rhyn sê hy was oorweldig deur hoeveel die gemeenskappe in Clanwilliam, Citrusdal en Porterville bygedra het, al trek baie van die mense in dié omgewing ook swaar. Hy raam die totale koste van die projek op sowat R500 000. Verder het die Clanwilliamse skoenmaker Strassbergers 50 pare velskoene vir plaaskinders geskenk.
“Die leerders het die projek HEEL BO: BO: hanteer en alleen die voer gaan haal. Hulle het self van die bale op die lande gaan haal en op die vragmotors gelaai,” sê Van Rhyn.
“Dit is nogal nie te versmaai om in só ’n kort tydperk ses vragmotors met voer te vul nie,” sê Toerien. “Die ondernemings en boere het rêrig hul harte en plaashekke vir ons oopgemaak om ons en die boere van die Noord-Kaap te help.” –