Nóg slaggate in Oos-Kaap-paaiestryd

RAADOP Oos-Kaapse boere wag reeds amper ses maande om te hoor hoe die provinsiale regering gaan voldoen aan ’n hofbevel om dié provinsie se ellendige paaie te verbeter.

Teen druktyd was die verwagting dat regter John Smith van die Grahamstadse hooggeregshof binnekort sou uitspraak gee in die voortslepende regsgeding wat begin het toe ’n raadop Agri Oos-Kaap verlede Augustus in dié hof ’n aansoek gebring het om die provinsie se direkteur-generaal van paaie en openbare werke te dwing om dringende instandhouding en herstelwerk te doen aan die grondpaaie wat onder sy departement se jurisdiksie val.

Op 12 Mei het Smith beveel die provinsiale regering moet binne 30 dae ’n verslag aan die registrateur van die hof voorlê wat uiteensit hoe hulle beplan

om die paaie binne hul jurisdiksie te herstel en in ’n goeie toestand te hou.

Mnr. Douglas Stern, voorsitter van Agri Oos-Kaap, het aan Landbouweekblad gesê die departement het sedertdien by drie geleenthede aansoek gedoen om uitstel vir die indien van die verslag.

WAG NÓG LANGER

Albei partye se regsverteenwoordigers het toe weer op 10 November voor die regter verskyn om hul saak te stel. Stern sê die provinsiale regering het op dié geleentheid bloot ’n opsomming gegee van watter instandhoudingswerk reeds gedoen is

en verduidelik dat hulle ernstige begrotingsprobleme ondervind. Die regter het ná die byeenkoms uitspraak voorbehou.

Stern sê die huidige agterstand met die instandhouding van paaie in die Oos-Kaap word op sowat R25 miljard beraam.

“Afgesien van onberekenbare skade wat jaarliks aan boere se voertuie aangerig word, is daar ook baie vervoermaatskappye wat weier om goedere op plase af te lewer of op te laai uit vrees dat hul vragmotors ook beskadig sal word.

“Die provinsie se grondpaaie word as die swakste in die land beskou,” het Stern bygevoeg.

–