Graan geweeg en toe swaar genoeg bevind
DuPont Pioneer se Weeg en Wen-kompetisie beloon Suid-Afrika se graanboere vir puik opbrengste.
Ondanks die droogte was daar finaliste met uitstekende inskrywings in DuPont Pioneer se Weeg en Wenkompetisie. Die inskrywings het alle verwagtinge oortref, veral in die lig van die uiterste toestande wat in die 2015’16oesjaar voorgekom het. Sowat 100 boere landwyd het deelgeneem en sewe wenners is in die verskillende kategorieë aangewys.
“Om ’n opbrengskompetisie aan te bied in ’n jaar waarin klimaatrekords spat, skets aanvanklik ’n ongunstige prentjie. Maar dan kry jy uitslae wat die asem wegslaan, soos wat ons in hierdie kompetisie gesien het. Dit spreek boekdele vir die vordering wat die topgraanboere reeds gemaak het,” sê mnr. Roelof le Roux, landboukundige by Pioneer HiBred.
SOJABOONWENNERS
Die hoogste opbrengs van sojabone in die westelike produksiestreek is behaal deur mnr. Armand de Villiers van Fochville, met ’n opbrengs van 3 ton/ha. Mnr. Mark Stein van Dundee het die hoogste opbrengs per hektaar van sojabone in KwaZuluNatal behaal deur 4,02 ton/ha te oes. In die oostelike produksiestreek was mnr. Pieter van Vuuren van Standerton die wenner met 3,96 ton/ha. Die hoogste produksie van sojabone onder besproeiing is deur mnr. Gerrit Roos van Belfast behaal, met ’n opbrengs van 5,2 ton/ha.
MIELIEWENNERS
Die afdeling vir mielies onder besproeiing is gewen deur mnr. Zirk Scheepers van Cradock. Sy opbrengs was ’n allemintige 20,5 ton/ha. Mnr. William Gibbings van Winterton in KwaZuluNatal het die hoogste produksie vir mielies onder droëlandtoestande in die oostelike produksiestreek behaal met 13,53 ton/ha. In die westelike produksiestreek was mnr. Bernard Rabe baas met mielieproduksie onder droëlandtoestande. Hy het 11,11 ton/ha behaal.
BESTE PRAKTYKE
Die wenners het pryse van altesame R400 000, sowel as ’n toer na die Rosslynaanleg en die DuPont Afrikategnologiesentrum in Delmas in Mpumalanga gewen.
Die deelnemers en die beoordelaars van die Weeg en Wenkompetisie was verras om te sien hoe goed die opbrengste in die SuidAfrikaanse kompetisie opweeg teen die Amerikaanse weergawe daarvan.
Toesighouers in die kompetisie moes teenwoordig wees tydens die oes, weeg en vogbepaling van die graan. Hulle moes ook die afmetings van die oesperseel bevestig en alle berekenings voltooi.
“SuidAfrikaanse boere staan nie ver terug vir hul eweknieë in Amerika nie. As ons die vele probleme van die afgelope oesjaar in ag neem, is ons dalk baie nader aan hulle as wat ’n mens raai,” sê Roelof.
Mnr. Tony Esmeraldo, handelsbestuurder van DuPont Pioneer SuidAfrika, sê die aankondiging van die wenners was te midde van die ergste droogte in 100 jaar.
“Pioneer is trots op al die boere wat vir die kompetisie ingeskryf het, ten spyte van die uitdagings wat die droogte gedurende die 2015’16seisoen gebring het. Hulle het ’n voorbeeld gestel van die tipe opbrengste wat verkry kan word wanneer die beste teelmateriaal met die beste bestuurspraktyke gekombineer word,” sê hy.
‘Die uitslae wat die asem wegslaan, spreek boekdele vir die vordering wat topgraanboere reeds gemaak het.’