Die sukses wat Agritech Expo reeds met landbouskoue behaal het, het hom oortuig om uit te brei na Arusha, die sleutellandboustreek van Tanzanië.
Die eerste en enigste buitenshuise landbouskou in Tanzanië wat spesifiek daarop gemik is om maatskappye bymekaar te bring, word in Januarie aangebied.
Me. Yolanda dos Santos, direkteur van Agritech Expo Tanzania, sê die ekonomiese groei in die Tanzaniese landboubedryf het die behoefte geskep aan ’n geleentheid waar verskaffers, boerderye van alle groottes en belanghebbendes in die landbouwaardeketting op ’n profes- sionele vlak kan bymekaarkom.
“Met die samewerking van die Landbouraad van Tanzanië en die Tanzaniese Tuinboukundige Vereniging, ons gasheervennote, is ons trots om Agritech Expo Tanzania by die Selian-landbounavorsingsinstituut in Arusha aan te bied.
“Agritech Expo Tanzania het voortgevloei uit die landboubesigheidskongres wat die afgelope drie jaar in Dar es Salaam aangebied is. Nadat met die bedryf oorleg gepleeg is, is besluit om nader aan die landbougemeen-
skap in Arusha te beweeg met die vestiging van die eerste en enigste buitenshuise landbouskou waar maatskappye by mekaar kan uitkom.
“Die geleentheid voorsien in die volle spektrum van behoeftes van die landbouwaardeketting, van gewasproewe in tonnels, opleiding en werksessies vir kommersiële boere tot professionele konsultasies en geleenthede om te netwerk.”
Die skou bied iets aan alle boere – van kommersiële tot opkomende en kleinboere. Dit word egter ook bygewoon deur sleutelamptenare van streeksregerings, landbouverenigings, nieregeringsorganisasies, hulp-, ontwikkelings- en navorsingsagentskappe, maatskappye wat in landbouprodukte handel dryf, insetverskaffers, konsultante en kenners, asook verskaffers van ontwikkelingskapitaal, beleggers en bankiers.
SUKSESVERHAAL
In April vanjaar is Agritech Expo Zambia die derde keer in Chisamba aangebied. Die driedaagse ekspo het hom gevestig as die grootste buitenshuise landbougeleentheid in die streek met ’n rekordgetal van 17 605 besoekers en 160 uitstallers op ’n uitstalruimte van 70 000 m2. Duitsland en Zimbabwe het paviljoene gehad, dit is bygewoon
deur die ministers van landbou van Zambië en die Tsjeggiese Republiek en die amptelike opening is behartig deur pres. Edgar Lungu van Zambië.
In Tanzanië is die landboubedryf geesdriftig oor die vooruitsig van die eerste Agritech Expo in die land. Vooraanstaande verskaffers aan die landboubedryf wat reeds hul betrokkenheid by die ekspo bevestig het, is Hughes-motors, Lonagro, Rivulis, Irrico, HortiPro, CMC Automobiles, Maji, FNB, Neptun, AMDT, John Deere, Massey Ferguson, Rijk Zwaan en Kibo.
Mnr. Kevin Lesser, oorhoofse bemarkingsdirekteur van John Deere in Kenia, sê John Deere is as uitstaller betrokke by Agritech Expo sedert die eerste een drie jaar gelede aangebied is.
“Ons is ingenome met die vordering wat die organiseerders maak om die geleentheid te laat groei. Hulle bereik almal wat ’n belang by die landbou het – van die regering tot kleinboere. Ons ondersteun die rigting wat beoog word vir die geleentheid in Tanzanië. Ons sien uit na die geleentheid volgende jaar.” melissa.bender@ spintelligent.com; 021 700 3593.