BEESVLEISPRYSE VERSTERK
Die swak rand, dalende slagsyfers en gunstige weer steun die prys van plaaslike beesvleis. Op internasionale vlak word hoër beesvleispryse tot einde vanjaar voorspel, volgens Absa se oorsig van landbouneigings.
Beesvleispryse het in die week van 22 November versterk teenoor die vorige week. Pryse sal na verwagting meer steun kry weens die verwagte hoër vraag in die komende feestyd.
Die voorspelde Absa-beesvleispryse is soos volg: Klas A is 0,16% hoër op R37,80/kg en klas C is 0,21% hoër op R32,95/ kg. Die speenkalfprys was gemiddeld 0,48% hoër op R20,95/kg.
Die prys van huide in die betrokke week was 0,31% laer (R15,24/kg) vir ’n groen huid. Dié pryse was in ooreenstemming met die swakker rand op 1,19%. Dié neiging kan voortduur om ’n uitwerking op die prys van velle te hê. Huidpryse word bepaal deur die gemiddelde pryse van die Rooivleisabattoir-vereniging en onafhanklike maatskappye saam te bereken.
Ander faktore wat vleispryse volgens die Absa-oorsig sal ondersteun, is die verkope teen die einde van die maand en die gunstige weer.
Absa verwag ook dat verbruikersdruk die vraag na veeprodukte kan benadeel, veral as pryse hoog is. Veepryse sal na verwagting steeds ondersteun word namate die onlangse reën weiding laat verbeter.
Volgende jaar kan ’n sterker rand en ’n verbetering in voerprysvlakke moontlik druk op pryse plaas.