LAE MIELIEPRYS KNOU VUISVOOS GRAANBOERE
’n Paar jaar lank is daar gehoop op en gebid vir reën. Uiteindelik het uitkoms hierdie somer gekom. Daar het gras gegroei waar niks was nie en gesaaides is meestal baie mooi.
Almal weet lankal dat daar voor die winter geen mielies in Suid-Afrika gaan wees nie. Ten spyte daarvan is die oesverwagting gebruik om die mielieprys tot ’n onrealistiese laagtepunt te laat daal.
Die feit is dat die afgelope produksiejare se skuld betaal moet word. Voor die aanvang van 2016-’17 se planttyd moes boere baie planne beraam om finansiering te bekom.
As daar nie genoeg geld gemaak word met vanjaar se oes sodat boere hul verpligtinge kan nakom nie, sal produksie ná hierdie produksiejaar grootliks tot ’n einde kom.
In Landbouweekblad is ook reeds gewaarsku dat die boere mooi moet dink voor hulle koring plant.
Daar is nou ’n kans om mielies se markprys te verander. Jy skiet jouself in elk geval in die voet om graan teen die heersende prys te verkoop.
As die huidige mielie-oes gereguleerd op die mark geplaas word nadat die prys herstel het as gevolg van die terughouding van die oes, is daar ’n kans dat ál die belanghebbendes hul geld kan terugkry en bly voortbestaan. Dit sluit die landboudienstebedryf, die kunsmisbedryf, brandstofmaatskappye, koöperasies en landboubesighede in.
’n Besluit om graan terug te hou, kan ondersteun word deur die banke en landboubesighede wat finansiering verskaf het as hulle ’n silosertifikaat van die produsent ontvang en die verkope oor die jaar versprei. Dit sal goeie resultate vir ál die partye hê, terwyl die landboubesighede in elk geval die graan as sekerheid het.
Daar is weinig ondernemings op die platteland wat sal bly bestaan as daar nie meer boere is nie.
Eweneens sal die Regering probleme hê waaraan hy nog nie gedink het as daar nie kos in Suid-Afrika is nie. JAN DELPORT Het jy iets op die hart? Skryf gerus aan ons. As dit die wenbrief is, ontvang jy R150 met die komplimente van BKB. Sê jou sê in hoogstens 300 woorde. Stuur dit aan: Die Redakteur, Brieweblad,
Posbus 1802, Kaapstad 8000. Of faks dit na: 021 406 2940 of gebruik e-pos: lbw@landbou.com. Verskaf jou naam en adres, al wil jy ’n skuilnaam gebruik.
Vandeesweek se wenbrief is deur Jan Delport geskryf.
KRY NOG VROEËR
As jy digitaal ingeteken is op Landbouweekblad, kan jy nou al Vrydae toegang kry tot die inhoud. Om in te teken teen net R11,70 per uitgawe, stuur ’n e-pos na support@mysubs.co.za of skakel 0861 697 827.