SINLOOS OM ESKOM NOU UIT TE DAAG
Die artikel “Eskom: Wanneer is genoeg genoeg?” (LBW ,8April 2016) het betrekking.
Die groot klagte is duidelik die heffings wat Eskom by boere se kragrekening voeg. Mnr. Ted Blom (’n energiekenner wat voorheen as werknemer, kontrakteur en raadgewer by Eskom betrokke was en nou Outa adviseer) skimp in die rigting van hofsake.
Asseblief, menere, bly weg. Julle gaan meer aan hofkoste bestee as wat moontlike besparings oor die volgende 20 jaar kan inbring.
Mnr. Blom is duidelik nog jonk of hy vergeet geriefshalwe hoe Eskom die boerepoelstelsel in 1986 ingestel het. Ek het destyds manalleen probeer om sin in die boere se koppe te praat, maar die enigste gevolg was dat ek verwyt is dat ek in die pad van vooruitgang staan. As LBW ál my briewe oor dié saak moes publiseer, sou dit ’n baie dik uitgawe gewees het.
Net om die agtergrond te gee, van 1981 tot 1984 het LBW verskeie artikels gepubliseer oor wind- en sonkrag wat uiters suksesvol op plase geïnstalleer is om huistoestelle en klein stukke gereedskap te bedryf. Daar was selfs ’n artikel oor ’n klein waterturbine.
En toe, op 4 Junie 1984 (nogal op my verjaarsdag), verskyn die hoofbestuurder van Eskom op die destydse TV-program Verslag en sê die volgende: “Die probleem met sonenergie, soos die ontwikkeling op dié tydstip is, is dat dit eintlik net geskik is waar ’n mens ’n behoefte het aan baie klein hoeveelhede elektrisiteit. Dit is veral op afgeleë plekke ver in ’n woestyn, of iets van dié aard, en plekke wat ver verwyder is van ’n distrubisienetwerk van ’n elektrisiteitsonderneming.”
Vir my was dit ’n oorlogsverklaring teen my onderneming. Ek het tientalle briewe