Staat gaan help teen wurms
ONBESTEDE geld van die Regering se omvattende steunprogram vir die landbou (Casp) sal heraangewend word om boere te help om die herfskommandowurm te bestry, sê mnr. Senzeni Zokwana, Minister van Landbou, Bosbou en Visserye. Dié steun sal aan kleinén kommersiële boere toegestaan moet word, gegewe dat nie een van hulle daarvoor begroot het nie. “Ek glo dat in elk van die gebiede waar die plaag aangetref word, sal ons dit kan uitwis soos enige ander wurm, want ons weet watter soort wurm dit is en watter plaagdoder om te gebruik.
“Die gebruik van plaagdoders sal afhang van boere se vermoë om dit te bekostig.”
Limpopo het reeds R8 miljoen opsy gesit om boere te help om die plaag te bestry, het Zokwana aan Landbouweekblad gesê.
Vertraagde bespeuring van die wurm is tans die grootste struikelblok in die bestryding daarvan, sê mnr. Jan Hendrik Venter, bestuurder van vroeëwaarskuwingstelsel vir plantgesondheid by die Departement van Landbou, Bosbou en Visserye.
Die voorkoms van die wurm is reeds in ses provinsies, Limpopo, Gauteng, Noordwes, Mpumalanga, Vrystaat en die NoordKaap bevestig. Die Wes-Kaapse geval kon nie bevestig word nie.
SUIKERRIET
Daar is nog geen bewyse dat die wurm ook plaaslik na suikerriet
versprei het nie, sê Venter.
“Ons het gehoor van die sporadiese voorkoms daarvan by suikerriet in ander lande. Dit is seker veral moontlik dat die wurms ook op suikerriet sal voed – veral waar dit naby mielies verbou word. Ons probeer nog self vasstel hoe groot die bedreiging is.”
Boere wat vermoed dat daar herfskommandowurms in hul lande is, moet dit so gou moontlik laat identifiseer sodat die regte plaagdoder gekoop kan word.
“As die verkeerde plaagdoder gebruik word, kan die wurm weerstand daarteen opbou. Daar is ook die risiko dat ’n neerslag van die plaagdoder op die gewas kan beland, wat onbedoelde gesondheidskwessies sal veroorsaak.”
NÓG PLAE
Dr. Gerhard Verdoorn, kenner van plaagbestryding, maan boere
dat oeste ná die droogte en reën besonder kwesbaar is vir alle Lepidoptera-spesies, ook die valskommandowurm, bolwurm, stamboorder, Asiatiese vrugtevlieg en tamatie blaarmyner.
“Dit is noodsaaklik om alle gewasse wat tans op die lande is, fyn te inspekteer vir skielike grootskaalse plaagbesmetting. Boere moet ook nie ongeregistreerde plaagdoders gebruik nie. Raadpleeg CropLife SA se datastelle by en
vir geregistreerde middels.”
Die Demokratiese Alliansie het mnr. Des van Rooyen, Minister van Plaaslike Regering en Tradisionele Sake, versoek om die wurmbesmetting ’n nasionale ramp te verklaar ingevolge die Wet op Rampbestuur.