MIN VORDERING MET OMKEERSTRATEGIE

MILJOENE rande is aan interaksie tussen betrokkenes in die koringbedryf bestee, maar min besluite is geneem en oor sekere goed kon hulle nie konsensus bereik nie, het mnr. Pieter Esterhuyzen van die konsultasiefirma Successions op die koringindaba op Elsenburg gesê.

Verskillende belanghebbendes het teruggerapporteer oor drie jaar van onderhandelinge, “baie praat, min luister en baie baklei”.

Die Koringforum is ná die afskaffing van die Koringraad in 1997 gestig om die rol te vervul van ’n staat wat hom toenemend aan die bedryf onttrek het. Daar was ’n gees van gesamentlike belang, dog Esterhuyzen meen daar is twyfel of die forum ’n toekoms het omdat die redes vir sy stigting moontlik nie meer geld nie. “Dalk is eie belang baie belangriker as wat ons dink, veral as ons kyk hoe ons drie jaar met mekaar gepraat en nie besluite geneem het nie.”

ONTWIKKELING

Dit het duidelik geword die bedryf benodig koringkultivars wat hoër opbrengste kan lewer.

Mnre. Andries Theron van die Suid-Afrikaanse agentskap vir kultivar-en-tegnologie-ontwikkeling (Sacta) en Jannie de Villiers, hoof uitvoerende beampte van Graan SA, het benadruk opbrengsverhogings kan bereik word sonder om die gehaltebehoeftes van meulenaars en bakkers te ignoreer. Die stigting van Sacta om kultivarontwikkeling te versnel, is een ding wat die bedryf wel reggekry het.

Die kultivarnorme is ook verslap omdat inligting toon dat Suid-Afrikaanse kultivars met die bestes ter wêreld vergelyk en koring met swakker eienskappe meermale ingevoer word.

Esterhuyzen het ook gewaarsku boere moet hulle gereedmaak vir minder tariefbeskerming. “Alle aanduidings is dat die heffing op ingevoerde koring heelwat laer gaan wees – ek dink in ’n band van R700 tot R800 per ton. Dit is bloot wat ek op die mark sien en hoor.”

BESLUIT ’N SLAG

Mnr. Francois Eksteen, ’n boer van Piketberg wat die indaba bygewoon het, het gesê te veel parasiete in die koringwaardeketting teer op boere. In ’n oproep om groter sekerheid vir die bedryf het mnr. Koos Blanckenberg van Klipheuwel by mnr. Chris Sturgess, wat die JSE verteenwoordig het, gepleit om besluite te neem oor hul voorstelle oor gewaarborgde uitlaaisertifikate en die R100-diskonto op ingevoerde koring. –

‘Alle aanduidings is dat die heffing op ingevoerde koring heelwat laer gaan wees.’