AB INBEV SE ONDERNEMINGS
Toe AB Inbev SAB oorgeneem het, het die maatskappy hom in ’n kontrak met die Suid-Afrikaanse Regering verbind tot swartbemagtiging. Die maatskappy onderneem onder meer om teen 2021 altesame 800 nuwe opkomende gars-, mielie- en hopboere te vestig. Dit is ook die maatskappy se strategiese voorneme om 2 600 werkgeleenthede te skep in die waardekettings van hierdie produkte.
Die maatskappy onderneem om die produksie- en verwerkingskapasiteit van moutgars en hop te vergroot en teen 2021 sowat 475 000 ton gars in te neem.
Verder word R610 miljoen toegewys aan die landbou vir navorsing, opleiding en die ontwikkeling van boere en die waardeketting. Beleggings sal, waar moontlik, geskied in ooreenstemming met die Regering se beleid vir landelike gebiede en die Nasionale Ontwikkelingsplan. Hulle stel veral belang in die agriparke-konsep. Aangesien agriparke hoofsaaklik in die noorde van Suid-Afrika ontwikkel word, stel dit ’n groot uitdaging aan die garsbedryf in die Wes-Kaap. Die bedryf moet verseker dat opkomende boere in dié provinsie ’n aandeel in die geleenthede kan hê.
‘GELEENTHEDE EN UITDAGINGS’
AB Inbev se ondernemings skep geleenthede en uitdagings. In die lig daarvan het Van Schoor gesê die vraag is of die droëlandgebiede in die toekoms steeds twee derdes van die moutgarsbehoefte gaan lewer, en of die verdeling tussen droëland en besproeiing gelyk gaan word. “Dit hang van julle af. Die bemagtigingskomponent gaan kritiek wees vir die Wes-Kaap se aandeel in garsproduksie, en die provinsie se groeipotensiaal op mediumtermyn gaan grootliks daarvan afhang. Ons moet anders na eienaarskap en bemagtiging kyk. Kyk na dít wat mnr. Kosie van Zyl van Napier en lede van die landboubemagtigingsgroep Agri Dwala doen. Die uitbreiding van garsproduksie kan andersins baie maklik na die besproeiingsgebiede gaan.”
In dié stadium is die gekommunikeerde vraag vir vanjaar se oes 320 000 ton vir die WesKaap – 310 000 ton daarvan in die Suid-Kaap en 10 000 ton in die Swartland. Slegs 225 000 ton daarvan kan op Caledon vermout word. Die res sal na Gauteng vervoer moet word.