KAAP AGRI NOTEER EERSDAAGS

KAAP Agri gaan binnekort “op die A-veld onder spreiligte speel” wanneer dié landboumaatskappy binne ’n paar maande op die JSE noteer.

’n Kennisgewing op Kaap Agri se webwerf het aandeelhouers ingelig dat die direksie Kaap Agri se bestuurspan opdrag gegee het om voort te gaan met die notering. Dit kom ná die groep se jaarvergadering.

Aandeelhouers sal op hoogte gehou word van verwikkelinge.

Mnr. Sean Walsh, besturende direkteur van Kaap Agri, sê notering is gereeld in die raad bespreek. “Jannie Mouton (PSGlegende) sê mos: As jy noteer, dan speel jy op die A-veld met die spreiligte op jou. Nou word dit ’n voldonge feit.”

Kaap Agri het tot dusver sy verhandeling oor die toonbank gedoen. Zeder, PSG se landboubeleggingsarm, besit bykans 40% in Kaap Agri.

Walsh sê hulle is opgewonde oor die nuwe era wat Kaap Agri betree. Volgens hom sal notering nie noodwendig die maatskappy se verdienste verbeter nie, dus moet die bestuurspan op hul strategiese uitkomste toegespits bly.

Die maatskappy het hom die afgelope jare toegespits op die vergroting van sy teenwoordigheid in die kleinhandel-, brandstof- en drankmark. Wesensverdienste het tussen 2012 en 2016 meer as verdubbel (R102,5 miljoen tot R210,3 miljoen). Dit beteken sy wesensverdienste het die afgelope vyf jaar jaarliks met 21,8% gegroei (saamgestelde jaarlikse groeikoers).

Kaap Agri se geweegde gemiddelde aandeelprys vir die 2016-boekjaar was R29,28. ’n Totale dividend van 94,5c is aan aandeelhouers uitbetaal. In 2012 is 35c per aandeel uitbetaal. Lees ook ’n onderhoud met Sean Walsh op bl. 36.