GM-TEGNOLOGIE VIR KLEINBOERE AMPER HIER
KOMMUNALE boere in die Oos-Kaap het onlangs ’n voorsmakie gekry van die verbeterde mieliekultivars wat van volgende seisoen af beskikbaar sal wees en spesifiek aangepas is by hul behoeftes.
Op ’n boeredag in Willowvale in die voormalige Transkei het die Landbounavorsingsraad (LNR) met die samewerking van die Oos-Kaapse departement vir landelike ontwikkeling en landbouhervorming, voorbrand gemaak vir die saad. Dit is ontwikkel as deel van die WEMATela, oftewel Waterdoeltreffende Mielies vir Afrika, ’n vennootskap tussen die staat en verskeie private maatskappye met die doel om voedselsekerheid te verseker en kleinboere in Afrika op te hef.
Die mielies is droogteweerstandig danksy konvensionele en transgeniese (GM) teelmetodes, en bevat ook insekbeskerming deur Monsanto se Bt-transgeniese (MON 89034) tegnologie.
Die saadkultivars is gekweek sodat bestaansboere minder tyd hoef te bestee aan onkruid trek en beter oeste tydens droë tye kan behaal. Dit bied ook beskerming teen insekte, soos stamboorders, vir boere wat nie plaagdoders kan bekostig nie.
Verder stel Monsanto ook die Bt-tegnologie tantiemevry aan plaaslike saadmaatskappye beskikbaar, wat die koopprys verlaag.
NÓG MOET VERBETER
Boere wat die geleentheid bygewoon het, sê daar is ook ander infrastruktuur wat ontbreek om hul boerderye vorentoe te vat.
Me. Anne Phakathi, wat mielies vir die Gwebendlala-projek buite Fort Malan plant, sê dit is moeilik om ’n mark vir haar mielies te vind. Daar is ook weinig of geen koöperasies of landbouwinkels waar sy produksiemiddelle kan aankoop of waar mielies ná die oes opgeberg kan word nie.
Ander boere het gesê daar was in die verlede nie voldoende opleiding oor hoe om te plant nie, maar by dié boeredag was daar wel ’n sessie oor plantvereistes.