Boere kan nou met Cipla Agrimed se Attila-opgietmiddel bloubosluise, meergasheerbosluise en rondewurms met ’n enkele opgietmiddel in hul beeskudde bestry.
Ná die onlangse goeie reën in die noordelike dele van Suid-Afrika is ’n ontploffing in bosluisgetalle waargeneem. Die reën is gevolg deur warm toestande, wat ideaal is vir die aanwas van bosluise en rondewurms. Daarmee saam is menige beesboer verras deur die toename in die voorkoms van bosluisoordraagbare siektes, soos rooiwater en galsiekte. Dit is deels weens die groot bosluisbevolking, maar ook omdat diere tydens die lang droogte dalk weerstand teen dié siektes verloor het omdat hulle minder aan bosluise blootgestel is.
Diere kan goeie weiding ten volle benut net as rondewurms goed bestry word.
Attila (reg.nr. G4197, Wet 36 van 1947) bevat ’n unieke kombinasie van twee dipstowwe: fiproniel en abamektien. Dit is die eerste opgietmiddel vir beeste wat bloubosluise, meergasheerbosluise en rondewurms in een opgietbehandeling bestry.
Groot getalle inwendige en uitwendige parasiete is nadelig vir diere. Omdat bosluise en sekere rondewurms bloedsuiers is, kan hulle bloedarmoede veroorsaak. Só verloor diere waardevolle proteïene wat nodig is vir groei, melkproduksie en immuniteit.
Diere word gereeld teen uitwendige parasiete behandel. Gevolglik begin bloubosluise weerstand teen die dipstowwe opbou. Dit word sigbaar wanneer bosluisgetalle nie beduidend afneem nadat diere behandel is nie. Die afwisseling met ’n dipstof wat ’n totaal ander aktiewe bestanddeel (’n nuwe dipstofgroep) bevat, is nodig om só ’n bloubosluisbevolking in toom te hou.
AKTIEWE BESTANDDELE
Fiproniel is ’n nuwe aktiewe bestanddeel wat aan die fenielpirasoolgroep behoort en nou die eerste keer in Suid-Afrika aan die beesmark gebied word. Dit word reeds met groot sukses in verskeie dele van die wêreld gebruik om bosluise te bestry.
Die werking verskil drasties van gewone kontakdipstowwe. Fiproniel versprei op die vel ná aanwending as ’n opgietmiddel. Dit word in die vetlaag onder die vel opgeneem en op lang termyn in die sweetkliere neergelê.
Die aktiewe middel word stelselmatig vrygestel en maak bosluise met kontak dood. Navorsing het getoon fiproniel het ook ’n lang nawerking op die vermoë van ’n wyfiebosluis om ’n nageslag te lewer. Anders as gewone opgietdipstowwe het die nawerking dus ook ’n impak op die bosluisbevolking in die omgewing.
Abamektien is ’n endektosied. Dit kan inwendige en uitwendige parasiete doodmaak. Die kombinasie van die twee aktiewe bestanddele in ’n unieke formule en die gebruikersvriendelike aanwending as ’n opgietmiddel verseker dat bloubosluise, meergasheerbosluise en rondewurms wat produksie en groei beperk, in gunstige weidingstoestande bestry kan word met een kostedoeltreffende behandeling. Die opgietmiddels verseker moeitelose, akkurate toediening wat minder arbeidsintensief is.
Die skerp toename in bosluis- en rondewurmgetalle in die laatsomer en herfs kan met Attila doeltreffend teengewerk word.
Begin met ’n enkele opgietbehandeling gevolg deur ’n tweede behandeling twee tot vier weke later na gelang van die soort bosluis wat die grootste probleem is. 7463 086124