WOL AL HOE GEWILDER IN AKSIEKLEREMARK
Merinowol het hom nou stewig in die mark vir buitelugdrag gevestig, meen mnr. Mark Koppes, ondervoorsitter van die Nieu-Seelandse firma Icebreaker.
Dié maatskappy, soos die landboumaatskappy BKB se Core Merino in Suid-Afrika, spesialiseer in die vervaardiging en bemarking van buitelugdrag van Merinowol. Mark werk al 30 jaar in die buitelugbedryf.
Die webtuiste het hom oor die stand en toekoms van die Merino-wolbedryf uitgevra. Hy sê die bedryf is gesond, hoewel daar deesdae minder betrokkenes as ’n paar jaar gelede is. ’n Paar van die groter handelsmerke het agtergekom Merinowol-materiaal is nie die maklikste om mee te werk nie en die voorsieningsketting is beperk. Maar die boetiekhandelsmerke, soos Icebreaker, sal altyd daar wees, meen hy.
Die onderneming se produkte raak ook al hoe gewilder onder buiteluggeesdriftiges omdat vordering in verwerkingstegnologie wol weer ’n “vriendelike” materiaal gemaak het.
Oor die toekoms meen hy van die grootste vooruitgang is op die terrein van die kombinering van wol met ander vesels, waaronder ’n spinproses waarmee ander vesels om ’n wolkern gespin word. Mark voorsien dat spesialishandelaars, soos Icebreaker, vanjaar hul wolvervaardigingsprosesse en ontwerpe verder gaan verbeter vir meer diverse gebruike.
Hy sê die vraag na buitelugprodukte van Merinowol groei steeds, met gepaardgaande groei in die Suid-Amerikaanse en Australiese Merino-skaapbedryf. Dit bring mee dat die maatskappy deesdae nie meer ál sy wol van Nieu-Seelandse skape kry nie.
In Suid-Afrika kom die wol vir BKB se Core Merino-reeks van wolboere wat BKB-kliënte is. Daar is dus ’n deurlopende skakel tussen die plaas en die winkelrak. “Wolboere weet waarheen hul wol gaan, en verbruikers het die vertroue dat die vesel in hul kledingstukke van die heel beste Suid-Afrikaanse Merinoskape afkomstig is,” sê me. Lucy Leurs, woordvoerder.
Merino-aksiedrag is gewild omdat dié wol soveel fyner as ander tipes is en dus gemaklik en sag dra. Die vesels is van nature anti-mikrobies en word nie maklik vuil nie danksy die chemiese struktuur wat ook reuke afweer. Omdat die materiaal “asemhaal”, word sweet van die vel af weggevoer en nie in die vesels vasgevang nie.
Voorts beskerm dié klere ’n mens teen koue én hitte en help dit om regdeur die jaar ’n optimale liggaamstemperatuur te handhaaf. gearjunkie.com