SONKRAG SKITTER IN VSA
Amerika se sonkragbedryf verskaf nou werk aan meer mense as enige ander energiebedryf, wat steenkool, olie en aardgas insluit.
Indiensneming in die sonkragbedryf het in die afgelope jaar met meer as 73 000 werkgeleenthede – oftewel 25% – gestyg, sê dié land se departement van energie in sy tweede jaarlikse verslag oor indiensneming in die energiebedryf. (Sien die GRAFIEK hieronder.)
Onder die bevindings is dat die mengsel van bronne waaruit elektrisiteit opgewek word, in dié land aan die verander is. Daar is ’n verskuiwing vanaf steenkoolaanlegte na meer aardgasopwekking en ander laekoolstofbronne.
Die drie voorste uitbreidings in die nasionale opwekkingsvermoë verlede jaar was vanaf sonkrag (9,5 GW), aardgas (8 GW) en wind (6,8 GW). Saam was dié drie bronne vir 93% van die land se algehele styging in opwekkingsvermoë verantwoordelik.
Netto kragopwekking uit steenkool het van 2006 tot 2016 met 53% afgeneem, terwyl aardgasopwekking met 33% en sonkragopwekking met meer as 5 000% gegroei het.
Luidens die verslag werk 6,4 miljoen Amerikaners nou in die energiebedryf (tradisionele energie én energiedoeltreffendheid).
Die meer as 300 000 nuwe werksgeleenthede wat verlede jaar in die bedryf geskep is, verteenwoordig 14% van alle nuwe werksgeleenthede wat in die Amerikaanse ekonomie geskep is.
Werksgeleenthede in die sektor vir energiedoeltreffendheid het in die afgelope jaar met 133 000 tot altesaam 2,2 miljoen gegroei. Die windenergie-sektor het met 25 000 werksgeleenthede tot 102 000 gegroei.
“Hierdie verslag bevestig die dinamiese rol wat ons energietegnologieë en infrastruktuur in ’n 21ste-eeuse ekonomie speel,” sê mnr. David Foster, ’n senior woordvoerder van die departement.
“Of ons nou natuurlike gas of sonkrag al hoe goedkoper lewer en of ons energieverbruik deur slim netwerke en brandstofdoeltreffende voertuie verminder, energievernuwing bewys homself as dié belangrike dryfkrag vir ekonomiese groei in Amerika,” sê David.