BEMESTING EN BESPUITING SORGVULDIG BEPLAN

Die hele blok waarin die 2 ha sojabone aaneenlopend geoes is wat mnr. Gerrit Roos met strooptyd vir die organiseerders van die Weeg en Wen-opbrengskompetisie moes aandui, beslaan 15 ha. “Ons het nie soseer vir ’n wen gemik nie, maar om die hoogste opbrengs moontlik te behaal.”

GRONDGEHALTE Net nadat die mielies geoes is (Julie/ Augustus), het hy 220 kg van die kunsmismengsel 0:1:2 van Omnia en 500 kg Growmax van Azbot (organiese bemesting) per hektaar breedwerpig uitgestrooi en dit met ’n skottelwerktuig ingewerk. In Augustus/September 2015 het Gerrit op dié blok, waarop die vorige twee jaar mielies was, 500 kg gips per hektaar toegedien. Kort voor planttyd het hy Roundup gespuit om die onkruid uit te knikker. ’n Week later het hy strookbewerking met ’n Orthman gedoen (al bewerking benewens die skottelbewerking) om ’n fyn saadbedding voor te berei. Die Orthman maak stroke grond 150-200 mm diep los. Direk agter die Orthman het die planter gevolg, wat ook vloeibare entstof saam met die saad in die plantervoortjie geplaas het. Daarmee saam het hy trigoderma (TrichoPlus, reg. nr. L7161, Wet 36 van 1947) en ’n swamentstof vir die bestryding van wortelsiektes op gewasse en vir verbeterde plantgroei (Trichderma fertile JM 41R) toegedien.

HOË PLANTESTAND Gerrit het die sojaboonsaad teen 410 000 sade/ha geplant, wat sowat 390 000 plante/ha oplewer. Na gelang van die kultivar plant hy op droëland 330 000380 000 sade/ha. Dié hoë plantestand is moontlik onder droëlandverbouing danksy die hoëreënvalgebied waarin die boerdery voorkom. Die gemiddelde jaarlikse reënval is 750 mm, maar was verlede jaar net 535 mm. Daarna het sy gewone chemiese behandelings gevolg. Agter die planter dien Gerrit Lamda van Arysta (reg.nr. L8546) met ’n hoogloopspuit toe om snywurms te bekamp, asook ’n algehele onkruiddoder, Metalochlor 960 EC van Arysta (reg.nr. L6947) en Extreme Plus WP van Arysta (reg.nr. L7238).

Sowat 30 dae ná opkoms spuit hy weer glifosaat. Hy gee die plantjies dus eers kans om sterk te word omdat hulle effens deur die onkruiddoder aangetas word. Daarmee saam spuit hy weer Lamda en Extreme 50WP (reg.nr. L6964) as aanvulling om nawerking te verskaf. Saam met die glifosaat dien Gerrit ook Brandt Smart Trio (reg.nr. B4289) toe om die nadelige uitwerking van glifosaat op die sojabone teen te werk.

BESKERMING TEEN SWAMME Kort voor blomtyd dien hy vloeibare koperchelaat toe om beskerming teen swamme te bied. Daarna volg MAP Tegnies (mono-ammoniumfosfaat; reg.nr. K6892) om blaarvorming te bevorder en ’n suikeroplossing as benatter (kleefmiddel) vir die MAP. “Ons is veronderstel om molibdeen ook te spuit, maar wanneer ons die grond met kalsitiese kalk behandel, gebruik ons eerder kalk van Pistorius Kalk vanaf Hiqua Kalsiet Witbank, wat molibdeen én fosfaat bevat.”

Daarna (voor die blomstadium) dien Gerrit MKP (monokaliumfosfaat) vir ekstra blaarvorming toe omdat sojabone se behoefte aan voeding dan hoog is. Hy gee ook ’n 4%-ureumoplossing vir beter opname en strooi 50 kg KAN (kalksteenammoniumnitraat) in korrelvorm uit.

Aan die begin van blomstadium volg ’n toediening van Agri Fullbor en AgriBoost vir ekstra boor, NPK en swamdoder.

Wanneer die bestuiwing voltooi is, spuit hy weer Roundup om seker te maak die lande bly skoon.