Klein meul span sonkrag in
Een van die klein koringmeulens in die Swartland het pas dakke vol sonpanele geïnstalleer en verwag om mettertyd sy kragrekening met sowat die helfte te verlaag.
Al word die Suid-Afrikaanse meelmark deur drie of vier groot meulenaars en verspreiders oorheers, is daar plek vir ’n paar klein meulens wat hul plek behoorlik volstaan in dié mededingende bedryf.
Mnre. Kobus Dippenaar van die plaas Swartberg en Jannie Smit van die plaas Tweevlei by Moorreesburg het in 1993 Moorreesburg Rollermeule op die plaas Kruisfontein buite Moorreesburg begin. Sedertdien het hulle heelwat veranderings aangebring om kliënte beter te bedien en koste te bespaar.
Die jongste verandering is 200 sonpanele op die dakke van die meul en pakhuise. Dit behoort hul maandelikse kragrekening met sowat die helfte te verlaag.
Kobus en Jannie sê hulle het personeel van die Kaapse sonkragmaatskappy Peninsula Technical Solutions verlede jaar by die skou op Moorreesburg ontmoet en begin ondersoek instel na sonkrag. “Ons gebruik Eskom se Ruraflex-stelsel, wat verskillende tariewe bied vir spitstyd (van 06:00 tot 08:00 en van 17:00 tot 20:00), mediumtyd deur die dag en ’n lae tarief vir die nag. Ons het ons kragrekening vergelyk met soortgelyke besighede in die stad en gevind ons betaal amper dubbel vir ons krag. Vir drie maande in die winter, Junie, Julie en Augustus, is ons krag nóg duurder,” sê Kobus. “Ons kragrekening van sowat R30 000 per maand is hoog vergeleke met ons produksie.” Peninsula Technical Solutions het die meul se kraggebruik gemonitor en drie opsies oorweeg: Sonpanele, windkrag ■ en batterye om krag op te berg. “Om krag op te berg is in dié stadium nog duur en onekonomies vir fabrieke. Ons het dus eers net sonpanele laat installeer.” Jannie en Kobus sê hul oogmerk is nie om weg te kom van Eskom nie, maar om hul kragrekening drasties af te bring – “selfs te halveer”. “Ons wil nie méér krag opwek as wat ons gebruik nie. Ons mag in hierdie stadium nie surpluskrag terugsit in die nasionale kragnetwerk nie. Die krag wat die sonpanele opwek, is min of meer ons verbruik deur die dag.” Die stelsel is egter so ontwerp dat hulle sonpanele, batterye of windlaaiers kan byvoeg. “Ons het besluit ons gaan die stelsel ’n toetslopie vir ’n jaar gee en dan kyk of ons wil uitbrei.” Verder gaan die stelsel outomaties na Eskomkrag oor as die